Hlăm hdră nao čhưn gưl knŭk kna truh ti China, tlam 19/8 mbruê, ti Sang tuê jưh Điếu Ngư Đài, Bắc Kinh, Khua gĭt gai Đảng, Khua lăn čar Tô Lâm bi tuôm hŏng Khua knŭk kna, Khua hlăm Anôk bruă kƀĭn ala China Lý Cường. Ti knăm anei, Khua gĭt gai Đảng, Khua lăn čar Tô Lâm mñă, Việt Nam dlăng myuôm klei mđĭ kyar jăk siam, hgŭm bruă kluôm hŏng China jing hdră êlan phŭn, klei mđing mrô sa hlăm hdră êlan hŏng tač êngao hnŭk êngiê, ngă phŭn mil pô mơ̆ng Việt Nam.

Khua knŭk kna Lý Cường mtă kơ dua tĭng lŏ dơ̆ng mđĭ hĭn klei bi mjĕ hgŭm bruă, mtrŭt mđĭ hdră bi mjĕ mjuk mnuih ƀuôn sang lehanăn phung hđeh gưl mrâo dua ala čar; pŏk hdră đru kơ al ƀuôn lehanăn bi hgŭm hlăm hdră mjuăt bi hriăm bruă, mđĭ kyar bruă klam mơ̆ng Anôk bruă bi mjĕ mjuk Việt Nam – China, mñă klă bruă krơ̆ng kjăp hdră êlan lu tĭng kpă ênuah lehanăn hdră êlan krĭng wăl pŏk mlar, mprăp bi hgŭm ti anôk bi kƀĭn trông lu tĭng. Dua tĭng ăt bi trông kơ dŭm bruă hlăm krĭng, tar rŏng lăn dôk mđing, tŭ ư msir mghaih jih klei amâo thâo bi djŏ, krơ̆ng kjăp klei êđăp ênang ti krĭng êa ksĭ, mjing wăl anôk jăk găl kơ hdră mđĭ kyar mơ̆ng dua ala čar./.