Aguah mbruê 15/8, ti anôk bruă Đảng gưl dlông, bi hdơr 79 thŭn hruê Krŭ kdơ̆ng mlan 8 leh anăn hruê mkŏ mjing ala čar yang ƀuôn ngă phŭn Việt Nam 2/9, Phŭn bruă kđi čar mkŏ mjing klei bi tuôm hŏng phung khua gĭt gai hđăp mơ̆ng Đảng, knŭk kna kñăm hưn kơ boh sĭt mơ̆ng Đảng, mơ̆ng lăn čar hlăm dŭm mlan akŏ thŭn 2024, bruă klam hlăm dŭm mlan knhah jih thŭn 2024 leh anăn hlăm wưng kơ anăp.

Blŭ hlăm klei bi kƀĭn Khua gĭt gai Đảng, Khua lăn čar Tô Lâm lač jăk kơ phung khua gĭt gai hđăp mơ̆ng Đảng, knŭk kna, mặt trận čar kwar Việt Nam nao leh hlăm mmông bi tuôm, mâo klei hơĭt hmưi kơ jih jang klei suaih pral, yâo mơak leh anăn klei jăk siam hĭn. Khua gĭt gai Đảng, Khua lăn čar Tô Lâm mñă ktang, Phŭn bruă kđi čar, Êpul khua bruă Đảng ktang phĭt gĭt gai, rơ̆ng ngă kdlưn hĭn, hnưm dưi ngă tŭ jing dŭm mta kñăm, bruă klam mâo Hdră mtrŭn klei kƀĭn kluôm tal 13 mơ̆ng Đảng ba mdah leh, mđing tal êlâo ruh mgaih klei dleh dlan, mkŏ mjing klei găl hlăm bruă hdră bhiăn, đru mguôp mkŏ mjing lăn čar, mđĭ hnơ̆ng klei hdĭp mnuih ƀuôn sang, mơ̆ng grăp êpul êya, knơ̆ng bruă hlăm leh anăn êngao lăn čar.