Aguah hruê 18/8, hlăm hruê mă bruă tal êlâo mơ̆ng gưl čhưn, Khua gĭt gai Đảng, Khua lăn čar Tô Lâm bi tuôm leh hŏng Hoàng Khôn Minh, Khua briă Đảng čar Quảng Đông. Leh kơnăn, Khua gĭt gai Đảng, Khua lăn čar Tô Lâm bi tuôm hŏng phung bi ala Êpul khua bi mjĕ mjuk China ti ƀuôn prŏng Quảng Châu.

Tlam hruê 18/8, ti Bắc Kinh, Khua gĭt gai Đảng, Khua lăn čar Tô Lâm nao čhưn, mă bruă hŏng Anôk bruă bi ala Việt Nam ti China. Khua gĭt gai Đảng, Khua lăn čar Tô Lâm mtă, Anôk bruă bi ala Việt Nam lŏ dơ̆ng pŏk ngă tŭ dưn dŭm klei bhiăn bi hgŭm bruă mơ̆ng dua âl čar, ba mdah dŭm klei bhiăn bi hgŭm mrâo djŏ guôp hŏng klei găl mơ̆ng dua ala čar, ba wĭt boh tŭ dưn kơ dua ala čar, djŏ hŏng hdră bhiăn tar rŏng lăn, kyua klei êđăp ênang lehanăn đĭ kyar, lŏ dơ̆ng mđĭ hĭn klei bhiăn hgŭm bruă dua ala čar, mtrŭt mđĭ hdră mjĕ mjuk mnuih ƀuôn sang./.