Khua gĭt gai Đảng, Khua lăn čar Tô Lâm bi mklă, knăm bi hdơr jing gưl kơ jih Đảng, mnuih ƀuôn sang, lĭng kahan bi hdơr êlam snăk kơ klei duh myơr prŏng prĭn mơ̆ng Hà Huy Tập hŏng bruă cách mạng, mbĭt anăn kơrŭ wĭt klei đăo knang, klei mĭn, klei čang hmăng gĭr ktưn leh anăn bruă klam ti anăp čar kwar. Klei hdĭp cách mạng mơ̆ng Hà Huy Tập jing klei bi knăl jăk siam mơ̆ng sa klei thâo mda asei khăp kơ ala čar, hnưm thâo săng êlan mtlaih êngiê ala čar mơ̆ng Khua gĭt gai Nguyễn Ái Quốc.

Hlăm ñu mâo klei mĭn klă mngač, klei jhŏng, knhuah hdĭp mnuih Cộng sản kpă ênô, jih klei hdĭp myơr kơ bruă krŭ kdơ̆ng mơ̆ng Đảng leh anăn djuê ana. Wăt hlăm boh klei dleh dlan hĭn, arăng ngă jhat amâodah tuôm hŏng klei djiê, ñu ăt sa ai tiê sĭt suôr hŏng Đảng, hŏng yang ƀuôn. Hlue si Khua gĭt gai Đảng, Khua lăn čar, hlăm wưng mrâo, knhuah hdĭp anăn brei jing hnơ̆ng čuăn ngă bruă mơ̆ng grăp čô knuă druh, đảng viên; jhŏng mĭn, jhŏng ngăm jhŏng êdah kdlưn, jhŏng đua klam, jhŏng ngă bruă kyua klei tŭ dưn mbĭt; mă boh tŭ klă sĭt jing hnơ̆ng mkă, mă klei ư ai, jăk mơak mnuih ƀuôn sang  jing hnơ̆ng čuăn kjăp hĭn.