VOV4.Êđê - Tlam mmăt mbruê 13/6, ti sang bruă kƀĭn ala, Khua gĭt gai Đảng, knŭk kna mâo leh klei bi tuôm hŏng phung bi ala bruă kƀĭn ala gưl 15 jing phung kreh knhâo. Blŭ hlăm mmông bi tuôm, Khua bruă kƀĭn ala Vương Đình Huệ mñă klă, hruê mmông êgao, phung kreh knhâo hlăm ala čar jing phung bi ala bruă kƀĭn ala mâo leh lu klei bi mguôp hlăm bruă mđĭ kyar klei kreh knhâo, mrâo mrang, bruă duh mkra ala ƀuôn, klei êđăp ênang, bruă lĭng kahan mơ̆ng ala čar. Hlăm klei kiă kriê, phung kreh knhâo jing phung bi ala bruă kƀĭn ala hrăm mbĭt hŏng bruă kƀĭn ala đru mguôp bi kluôm ênŭm klei kiă kriê, bi djăp ênŭm klei čiăng mtrŭt mđĭ kdrăp dưn yua, mđĭ kyar klei kreh knhâo mrâo mrang.

Hŏng klei đăo knang kơ klei mĭn, klei thâo bruă, leh anăn ai tiê mơ̆ng phung kreh knhâo jing phung bi ala bruă kƀĭn ala, Khua bruă kƀĭn ala Vương Đình Huệ hmăng hmưi, khădah dôk hlăm grăp bruă păn, hŏng bruă klam jing phung bi ala kơ mnuih ƀuôn sang, hŏng klei mĭn, bruă ngă leh anăn klei thâo mơ̆ng phung kreh knhâo, klei gĭr ktưn ruh mgaih klei dleh dlan mơ̆ng mnuih Việt Nam, srăng lŏ mâo lu hĭn klei bi mguôp kơ bruă mđĭ kyar klei kreh knhâo mrâo mrang ala čar.

Y-Ƀel pô mblang