VOV4.Êđê- Ƀri wưng bi hdơr 132 thŭn hruê k’kiêng kơ khua gĭt gai Hồ Chí Minh (19/5/1890-19/5/2022), aguah anei 19/5, êpul bi ala khua gĭt gai Đảng, knŭk kna leh anăn Dhar bruă mặt trận gưl dlông nao dưm leh kwang mnga, nao čuă msat khua gĭt gai Hồ Chí Minh leh anăn myơr brui mngưi bi hdơr kơ phung jhŏng ktang djiê êngiă.

Ti anăp rup khua gĭt gai Hồ Chí Minh, phung bi ala bi êdah klei hdơr knga, klei mpŭ kơ dŭm klei đru mguôp prŏng prĭn mơ̆ng khua gĭt gai Hồ Chí Minh hlăm klei mtaih êngiê djuê ana, hluh hlir ala čar, mkŏ mjing ala čar yang ƀuôn ngă phŭn Việt Nam êđăp ênang, êngiê, hluh hlir.

Kwang mnga mơ̆ng êpul mâo boh hră “Lă lar hdơr kơ khua gĭt gai Hồ Chí Minh”. Leh nao čuă msat khua gĭt gai Hồ Chí Minh, êpul bi ala nao dưm kwang mnga, myơr brui mmgưi, bi hdơr kơ phung jhŏng ktang djiê êngiă ti knưng bi hdơr êlan Bắc Sơn. Kwang mnga mâo boh hră “Lă lar hdơr kơ phung jhŏng ktang djiê êngiă”.

Pô mblang: Y-Ƀel Êban