Anei jing hdră yuôm bhăn đru mđĭ leh anăn bi êlam hĭn klei mjĕ giăm bi hgŭm prŏng prĭn, klei bi mguôp kluôm dhuôm plah wah dua Đảng, dua knŭk kna leh anăn mnuih ƀuôn sang dua lăn čar Việt Nam – Lào. Hlăm klei bi tuôm, dua čô khua gĭt gai mñă ktang knhuah gru hƀuê ênuk bi hgŭm, bi đru hdơ̆ng pô, mñă klă klei mjĕ giăm Việt Nam – Lào jing ngăn dŏ yuôm bhăn mơ̆ng dua djuê ana, jing mta phŭn, hdră bhiăn hbuê ênuk leh anăn jing ai ktang mơ̆ng dua Đảng, dua lăn čar čiăng dưi bi lar, lŏ čuê kơ ênuk êdei anăp. Khua gĭt gai Đảng Nguyễn Phú Trọng mñă klă, klei mjĕ giăm Việt Nam – Lào mâo bruă klam yuôm bhăn, jing klei mđing tal êlâo hlăm hdră êlan hŏng tač êngao mơ̆ng Việt Nam, mbĭt anăn mñă ktang đa đa mta phŭn kñăm mđĭ hĭn klei mjĕ giăm plah wah dua Đảng, dua lăn čar hlăm wưng kơ anăp.

Hlăm klei bi tuôm, Khua knŭk kna Phạm Minh Chính leh anăn Khua knŭk kna Lào Xỏn-xay Xỉ-phăn-đon bi tŭ ư dua Đảng, dua lăn čar čiăng mđĭ hĭn klei bi hgŭm, mtrŭt mđĭ klei bi mguôp bruă lĭng kahan, klei êđăp ênang leh anăn bruă hŏng tač êngao, mkŏ mjing klei kdlưn hĭn hlăm klei bi mguôp bruă duh mkra, lŏ dơ̆ng mlih mrâo, mđĭ hĭn boh tŭ dưn klei bi mguôp hlăm dŭm mta bruă, kñăm mđĭ hĭn klei bi mguôp Việt Nam – Lào, kyua boh tŭ dưn klă klơ̆ng mơ̆ng mnuih ƀuôn sang grăp lăn čar, kyua klei êđăp ênang, bi mguôp leh anăn đĭ kyar hlăm alŭ wăl leh anăn tar rŏng lăn.