VOV4.Êđê- Tlam mbruê 25/5, ti Sang bruă kƀĭn ala, Khua gĭt gai Đảng leh anăn Knŭk kna bi tuôm hŏng phung bi ala bruă kƀĭn ala jing mnuih djuê ƀiă gưl 15. Khua bruă kƀĭn ala Vương Đình Huệ mñă klă, Đảng leh anăn Knŭk kna bi mklă klei bi hgŭm jih jang djuê ana jing yuôm bhăn hŏng ala čar drei, sa ala čar mâo 54 djuê ana hdĭp mda, bi hgŭm, bi mpŭ leh anăn bi đru mđĭ kyar.

Khua bruă kƀĭn ala Vương Đình Huệ čang hmăng phung bi ala bruă kƀĭn ala jing mnuih djuê ƀiă mđing dlăng kơ klei bhiăn, hdră êlan rơ̆ng hlue ngă tŭ dưn hdră mtrŭn mơ̆ng Knŭk kna ti krĭng čư̆ čhiăng, knông lăn, krĭng mnuih djuê ƀiă; kƀĭn mkŏ mjing krĭng mnuih djuê ƀiă leh anăn krĭng čư̆ čhiăng đĭ kyar pral kơ bruă duh mkra, dhar kreh, ala ƀuôn, kjăp kơ klei êđăp ênang, lĭng kahan, ñŭ kma hŏng klei đĭ kyar mbĭt mơ̆ng kluôm ala, năng hŏng klei găl yuôm bhăn mơ̆ng lăn čar./.

                                               Pô mblang: H’Zawut Ƀuôn Yă