Mlan 9/2023, ti ƀuôn prŏng Pleiku, čar Gia Lai, Khua lăn čar Võ Văn Thưởng nao čhưn, mă bruă ti Binh đoàn 15 - anôk bruă mâo giăm 40 thŭn hlue ngă bruă klam mkŏ mjing dŭm wăl duh mkra lĭng kahan ti Lăn Dap Kngư. Mñă klă, krĭng Lăn Dap Kngư mâo bruă klam yuôm bhăn, jing anôk phŭn ti Đông Dương, Khua lăn čar mtă kơ Binh đoàn 15 lŏ dơ̆ng ksiêm dlăng klei mĭn, hdră êlan lĭng kahan mơ̆ng Đảng, bruă Đảng kahan gưl dlông, Phŭn bruă lĭng kahan, păn kjăp hdră răng mgang čar kwar hlăm boh klei mrâo, Hdră mtrŭn mơ̆ng Phŭn bruă kđi čar kơ hdră tă mđĭ kyar bruă duh mkra- ala ƀuôn leh anăn rơ̆ng klei êđăp ênang ti krĭng Lăn Dap Kngư, tă hdră truh thŭn 2045. 

Bi hgŭm kjăp hŏng gưl bruă đảng, bruă sang čư̆ êa leh anăn mnuih ƀuôn sang ti alŭ wăl čiăng gĭr hlue ngă dŭm bruă klam duh mkra- ala ƀuôn; răng mgang bruă klam ba anăp hlăm dŭm bruă klam mơ̆ng alŭ wăl ti anôk kđông kahan dôk jưh.

Mlan 8/2023, Khua knŭk kna Phạm Minh Chính mă bruă hŏng Anôk dlăng bruă Đảng čar Kon Tum kơ boh klei hlue ngă bruă klam mđĭ kyar bruă duh mkra- ala ƀuôn. Khua knŭk kna Phạm Minh Chính bi mni kơ klei gĭr ktưn leh anăn bi mni boh tŭ dưi mâo mơ̆ng bruă Đảng, bruă sang čư̆ êa, lĭng kahan leh anăn mnuih ƀuôn sang čar Kon Tum. Hlăm wưng kơ anăp, Khua knŭk kna mtă kơ čar Kon Tum brei mđĭ kyar prak, ktang, kjăp hĭn, brei răng mgang klei êđăp ênang lĭng kahan ti krĭng mnuih djuê ƀiă, klei đăo, knông lăn leh anăn amâo brei mâo klei amâo mprăp hlăm klei răng mgang êđăp ênang kđi čar. Mkŏ mjing krĭng kơ bruă bi hgŭm bruă duh mkra, mtăp mđơr, tŭ dưn leh anăn răng mgang mđĭ lar dưi mâo knhuah dhar kreh djuê ana.

Khua knŭk kna mtă êlâo hĭn brei kƀĭn mđing ktuê dlăng dŭm hdră kñăm, bruă klam čiăng kƀĭn gĭt gai, hlue ngă tŭ dưn, thŭn êdei brei lu hĭn thŭn êlâo leh anăn gĭr dưi ngă dŭm hdră kñăm kčah leh.