VOV4.Êđê - Tlam mbrue (25/8) ti anôk bruă Đảng gưl dlông, Khua gĭt gai Đảng Nguyễn Phú Trọng mâo leh klei blŭ hrăm hlăm đĭng blŭ hŏng Khua mil čhil Indonesia Joko Widodo. Khua gĭt gai Đảng hơêč hmưi kơ khua mil čhil dŭm boh tŭ dưn ala čar Indonesia mâo leh, hlăm anăn wăt bruă mdrơ̆ng hŏng klei ruă tưp Covid 19, klei lŏ kơrŭ wĭt bruă duh mkra, dŭm bruă hŏng ala tač êngao bŏ hŏng klei jăk mơ̆ng Indonesia, lehanăn jih jang bruă klam jing khua kiă kriê G20 thŭn 2022.

Êjai boh klei dua ala čar hlăk čhuang hlăm wưng mđĭ kyar mrâo, Khua gĭt gai Đảng bi êdah dŭm hdră êlan prŏng kơ klei bi mguôp dua ala čar. Khua gĭt gai Đảng čang hmăng dua nah bi thâo săng hĭn, bi đăo knang bruă kđi čar mơ̆ng klei bi tuôm gưl dlông, hlue ngă dŭm mta bruă leh bi tŭ ư, hlămanăn mâo bruă răng mgang klei êđăp ênang. Khua gĭt gai Đảng čang hmăng kơ dua nah hyuă kjăp hĭng klei hgŭm bruă duh mkra, hgŭm hlăm djăp bruă ti alŭ wăl, lehanăn bruă hŏng tač êngao, hlăm anăn mâo bruă êa ksĭ Ngŏ, lehanăn klei hgŭm ASEAN, mbĭt hŏng djăp klei ti anôk bi kƀĭn mkăn./.

Y-Khem pô mbllang