VOV4.Êđê- Tlam mbrue 31/3, ti anôk bruă Đảng gưl dlông, Khua gĭt gai Đảng Nguyễn Phú Trọng mâo leh klei bi blŭ hrăm hlăm đĭng blŭ hŏng khua knŭk kna Alemăng, Khua Đảng yang ƀuôn hnŭk êngiê Olaf Schoz. Hlăm klei bi blŭ hrăm anei, Khua knŭk kna Olaf Schoz hơêč hmưi kơ klei tŭ dưn Việt Nam mâo hlăm klei mđĭ kyar lăn čar, mđĭ k’hưm pô hŏng tač êngao, lehanăn bi myuôm bruă ala čar Alêmăng bi mguôp hŏng Việt Nam, hlăk dôk mâo lu klei đĭ kyar jăk.

Dua khua gĭt gai lŏ mtrŭt mđĭ klei bi hgŭm djăp mta bruă wưng kơ anăp. Kơ boh klei ti êa ksĭ Ngŏ, dua nah bi tŭ ư hŏng hdră êlan klei êđăp ênang, hơĭt kjăp lehanăn mđĭ kyar bi mpŭ kơ klei bhiăn dlông rŏng lăn, hlăm anăn mâo klei bhiăn kơ êa ksĭ mơ̆ng Êpul hgŭm lu ala čar thŭn 1982. Kơ bruă anei, Khua gĭt gai Đảng Nguyễn Phú Trọng lač, hdră êlan sa anăn mơ̆ng Việt Nam mpŭ kơ klei bhiăn tar rŏng lăn, hmăng hmưi mâo nanao klei bi blŭ hrăm, amâo mâo truh kơ klei bi blah ôh, mghaih msir djăp mta bruă hŏng klei bhiăn tar rŏng lăn./.

Pô mblang: Y-Khem Niê