Tlam mbrue 22/5, ti Anôk bruă Đảng gưl dlông, Khua gĭt gai Đảng Nguyễn Phú Trọng mâo leh klei bi blŭ hrăm hŏng khua kiă kriê Đảng ala čar Russia hluh lir Dmitry Medvedev hlăk mâo gưl hriê čhưn lehanăn mă bruă ti Việt Nam mơ̆ng hrue 21 - 23/5/2023 tui si klei bi tŭ ư hgŭm bruă plah wah Đảng Cộng sản Việt Nam lehanăn Đảng “Ala čar Russia hluh lir”.

Ti anôk bi blŭ hrăm, khua čô khua kiă kriê bi êdah klei mơak kơ klei hgŭm mâo leh mơ̆ng đưm jăk siam, lehanăn hgŭm mbĭt kluôm dhuôm plah wah dua ala čar, lehanăn klei bi mguôp kjăp siam plah wah dua Đảng hŏng klei bi đăo knang prŏng hlăm bruă kđi čar, bi êdah klei bi mjĕ êrô khua prŏng dua ala čar, dua Đảng. Mñă klă Việt Nam bi myuôm klei thâo bi đru mơ̆ng mnuih ƀuôn sang Russia, khua gĭt gai Đảng lŏ mñă hdră êlan hŏng ala tač êngao mơ̆ng pô, Việt Nam păn kjăp klei bi mguôp mâo leh mơ̆ng đưm hŏng Russia, Đảng Cộng sản Việt Nam dlăng klei bi mguôp hŏng dŭm Đảng phŭng ti Russia, hlăm anăn mâo Đảng “Ala čar Russia hluh lir”, mjing atur kơ bruă kđi čar hlăm klei bi mguôp kjăp plah wah dua ala čar./.