VOV4.Êđê- Hluê ngă hdră bi tuôm hŏng phung bi ala êlâo kơ klei kƀĭn gưl tal 3, bruă kƀĭn ala gưl 15, aguah mbruê, Khua gĭt gai Đảng Nguyễn Phú Trọng mbĭt hŏng êpul bi ala bruă kƀĭn ala ƀuôn prŏng Hà Nội, anôk bruă ruah khua mrô 1, ngă bruă bi tuôm hŏng phung bi ala ti dŭm kdriêk čar Đống Đa, Ba Đình, Hai Bà Trưng, dưi mkŏ mjing hŏng êlan klă anăp bi mguôp hŏng online.

Bi ala kơ phung bi ala bruă kƀĭn ala anôk bruă ruah khua mrô 1, Khua gĭt gai Đảng Nguyễn Phú Trọng mâo klei mđing hmư̆ dŭm klei blŭ bi êdah kluôm êlam, klah čŭn, djŏ hŏng boh sĭt, klă klơ̆ng ƀiădah mâo knhuah hdră êlan leh anăn bruă klam mơ̆ng phung bi ala, đru mđĭ hnơ̆ng tŭ jăk klei ngă bruă mơ̆ng êpul bi ala bruă kƀĭn ala ƀuôn prŏng Hà Nội leh anăn bruă kƀĭn ala gưl 15. Bơ̆k bâo kơ bruă gang mkhư̆ klei ƀơ̆ng ngăn, klei amâo mâo jăk, Khua gĭt gai Đảng Nguyễn Phú Trọng brei thâo, hlăm klei kƀĭn gưl dlông 5 mrâo bi ruê̆, gưl dlông bi tŭ ư mkŏ mjing êpul gĭt gai gưl čar kơ bruă gang mkhư̆ klei ƀơ̆ng ngăn, klei amâo mâo jăk čiăng lŏ dơ̆ng bi lar dŭm boh tŭ dưn dưi mâo leh hlăm 10 thŭn êgao, mkŏ mjing klei sa ai truh kơ 63 čar, ƀuôn prŏng hlăm kluôm ala, đru hlăm bruă gang mkhư̆, hmao ƀuh phung mâo klei mĭn toh hroh truh kơ bruă ƀơ̆ng ngăn, klei amâo mâo jăk, luč liê mang.

Pô mblang: Y-Ƀel Êban