VOV4.Êđê - Aguah mbruê 22/4, Phŭn bruă kđi čar, êpul khua bruă Đảng mkŏ mjng leh klei kƀĭn trông kluôm ala hŏng êlan klă anăp leh anăn online kơ klei hyuă kjăp, hluê ngă hdră mtrŭn mrô 13 mơ̆ng phŭn bruă kđi čar gưl 13 kơ klei đĭ kyar bruă duh mkra ala ƀuôn leh anăn rơ̆ng klei êđăp ênang alŭ wăl krĭng dap mnai krông Cửu Long. Blŭ hlăm klei kƀĭn, Khua gĭt gai Đảng Nguyễn Phú Trọng hlăk mblang leh 3 mta phŭn mơ̆ng phŭn bruă kđi čar ba mdah klei bi klă mrâo kơ krĭng dap mnai krông Cửu Long.

Hlăm anăn mâo mta phŭn mrâo hlăm hdră mtrŭn mrô 13, anăn jing bi klă mta kñăm kluôm ênŭm leh anăn đa đa hdră kčah gĭr ktưn truh ti thŭn 2030: “Krĭng dap mnai krông Cửu Long jing wăl hdĭp mda, mrâo mrang leh anăn kjăp, mâo knhuah dhar kreh krông êa, jing anôk bruă duh mkra bruă lŏ hma kjăp, mbruă leh anăn mâo boh tŭ yuôm bhăn hlăm ala čar, alŭ wăl leh anăn tar rŏng lăn.” Khua gĭt gai Đảng Nguyễn Phú Trọng uêñ mĭn hĭn kơ 5 mta boh klei čiăng hluê ngă hlăm hruê mmông kơ anăp, mtă kơ êpul khua bruă Đảng hlăm knŭk kna mjêč mkŏ mjing, ba mdah dŭm hdră ngă bruă hluê ngă hdră mtrŭn, jao bruă klam kơ dŭm phŭn, dhar bruă gưl dlông leh anăn dŭm alŭ wăl hlăm krĭng.

Y-Bel pô mblang