VOV4.Êđê- Aguah mbrue (29/8), ti Anôk bruă Đảng gưl dlông, Khua gĭt gai Đảng Nguyễn Phú Trọng mâo leh mmông ngă bruă hŏng 80 čô phung bi ala jing mnuih kdlưn hĭn nao kơ anôk bi kƀĭn prŏng kluôm ala tal 11, Êpul Hgŭm Gru bi kal hrah Việt Nam wưng thŭn 2022 – 2027. Hŏng klei jing Khua kiă kriê Êpul hgŭm Gru bi kal hrah Việt Nam gưl 10, Khua gĭt gai Đảng bi êdah klei mơak mâo bi tuôm hŏng êpul bi ala nao ti anôk kƀĭn prŏng, lehanăn jih jang phung ngă bruă Êpul hgŭm bi kal hrah kluôm ala hŏng ai tiê klei khăp prŏng, mâo klei čuă êmuh jih ai tiê, lehanăn klei hơêč hmưi jăk siam hĭn.

Khua gĭt gai Đảng lač, bruă đru dŏng jing knhuah gru jăk siam mâo leh mơ̆ng djuê ana drei, bi êdah klei thâo bi khăp, thâo bi đru, lehanăn răng mgang anak mnuih; jing leh giê mkă kơ kreh dhar, lehanăn klei đĭ kyar. Khua gĭt gai Đảng čang hmăng, wưng kơ anăp dŭm gưl êpul hgŭm bruă gru bi kal hrah hlăm kluôm ala mâo nanao klei mđing mkŏ mjing êpul hgŭm, lehanăn knuă druh, ƀĭng hgŭm, ngă bruă hlăm klei thâo bi đru, dưn yua jih bruă klam pô mđĭ nanao k’hưm mơ̆ng êpul hgŭm./.

Pô mblang: Y-Khem Niê