VOV4.Êđê -  Hrue mbrue (13/9), ti anôk bruă Đảng gưl dlông, Khua gĭt gai Đảng Nguyễn Phú Trọng drông čhưn leh hŏng Khua bruă kƀĭn ala Campuchia Samdech Heng Samrin hlăk mâo gưl hriê čhưn ti Việt Nam. Ti anôk đrông anăn, Khua gĭt gai Đảng Nguyễn Phú Trọng bi klă klei mjĕ mgiăm hgŭm mbĭt plah wah dua Đảng, dua knŭk kna lehanăn phung ƀuôn sang dua ala čar knư̆ hrue mđĭ kyar hŏng klei mtrŭn agha kjăp hĭn, klă mngač lehanăn mâo klei tŭ dưn hĭn, ba wĭt leh klei tŭ jăk êdi kơ phung ƀuôn sang dua ala čar.

Khua gĭt gai Đảng lač, Đảng, knŭk kna lehanăn phung ƀuôn sang Việt Nam sa ai nanao hlăm klei rŭ mdơ̆ng lehanăn mđĭ kyar lăn čar ti Campuchia, lač jăk kơ klei sa ai, klei bi đru yuôm bhăn Campuchia kah leh hŏng Việt Nam mơ̆ng êlâo dih truh kơ ară anei. Khua gĭt gai Đảng mñă knhuah gru mâo leh mơ̆ng đưm jing yuôm bhăn êdi hlăm klei bi mguôp 3 ala čar Việt Nam – Lao – Campuchia, lehanăn čang hmăng 3 ala čar mđrăm mbĭt bi kriê pioh, ksul mbŭ kơ klei bi mguôp 3 nah knư̆ hruê kjăp hĭn, kyua klei mdrŏng sah mơ̆ng mdê bi ala čar, kyua klei êđăp ênang, hơĭt kjăp, bi hgŭm lehanăn mđĭ kyar ti alŭ wăl lehanăn tar rŏng lăn./.

Y-Khem pô mblang