VOV4.Êđê- Tlam mbruê (29/9), ti anôk bruă Đảng gưl dlông, Khua gĭt gai Đảng Nguyễn Phú Trọng drông leh Emanuel Marrero Cruz, khua knŭk kna ala čar Cuba ƀri hriê čhưn Việt Nam. Ti anôk drông čhưn anăn, Khua gĭt gai Đảng lač, Đảng, Knŭk kna lehanăn phung ƀuôn sang Việt Nam mpŭ nanao lehanăn hdơr knga sa ai, hŏng klei đru mơ̆ng Đảng, knŭk kna, lehanăn phung ƀuôn sang Cuba hlăm klei bi blah sua mă klei êngiê kơ djuê ana lehanăn rŭ mdơ̆ng lăn čar Việt Nam.

Khua gĭt gai Đảng đăo knang ti gŭ klei gĭt gai mơ̆ng Đảng Cộng sản Cuba, phung ƀuôn sang Cuba ngă jăk hĭn bruă duh mkra ala ƀuôn, rŭ mdơ̆ng lăn čar, hnŭk êngiê, yang ƀuôn ngă phŭn mdrŏng sah kjăp ktang. Khua gĭt gai Đảng čang hmăng dua nah lŏ hyuă kjăp hĭn lehanăn jih ai tiê mâo klei bi mguôp tlâo tĭng mơ̆ng bruă Đảng, bruă knŭk kna, lehanăn phung ƀuôn sang, tŭ jing hlăm klei bi hgŭm, hrăm mbĭt bi đru./.

Pô mblang: Y-Khem Niê