Khua gĭt gai Đảng Nguyễn Phú Trọng bi mni kơ Khua knŭk kna Roman Golovchenko klă klơ̆ng hriê čuă Việt Nam leh anăn hơêč hmưi ơ Belarus dưi mâo lu boh tŭ dưn hlăm bruă bi hơĭt bruă kđi čar, mđĭ kyar lăn čar, rơ̆ng bi hơĭt klei hdĭp yang ƀuôn leh anăn mđĭ kơhưm hlăm alŭ wăl. Bi myuôm boh tŭ mơ̆ng klei blŭ hrăm, klei bi tuôm plah wah Khua knŭk kna Belarus hŏng phung khua gĭt gai Việt Nam, Khua gĭt gai Đảng Nguyễn Phú Trọng yap yuôm bhăn dŭm klei đĭ kyar hlăm klei mjĕ giăm Việt Nam leh anăn Belarus, bi êdah klei đăo knang gưl hriê čuă srăng mkŏ mjing boh kdrŭt mrâo mtrŭt mđĭ klei bi hgŭm leh anăn bi mguôp lu mta bruă lah wah Việt Nam leh anăn Belarus hlăm wưng kơ anăp.

Khua gĭt gai Đảng Nguyễn Phú Trọng ăt bi trông hŏng Khua knŭk kna Roman Golovchenko kơ đa đa hdră êlan prŏng kñăm mtrŭt mđĭ klei bi hgŭm knhuah gru 2 lăn čar đĭ ti hnơ̆ng mrâo, kah mbha klei hriăm, mđĭ hĭn klei bi mguôp kluôm dhuôm. Đảng cộng sản Việt Nam mprăp bi kjăp leh anăn mtrŭt mđĭ klei bi mguôp hŏng dŭm Đảng mơ̆ng Belarus.