VOV4.Êđê - Tlam hruê 21/3, ti anôk bruă Đảng gưl dlông, Khua gĭt gai Đảng Nguyễn Phú Trọng drông leh Dato’ Sri Ismail Sabri bin Yaakob, Khua knŭk kna Malaysia hriê kkuh hlăm wưng dôk čhưn ti Việt Nam. Khua knŭk kna Malaysia hưn mthâo hŏng Khua gĭt gai Đảng kơ boh tŭ bi trông hŏng Khua knŭk kna Phạm Minh Chính, mñă Malaysia dlăng myuôm klei bi mjĕ ƀĭng hgŭm phŭn hŏng Việt Nam, čang hmăng dua tĭng mtrŭt mđĭ hdră bi hgŭm dua nah hlăm bruă duh mkra, mnia mblei, duh bi liê lehanăn mjĕ mjuk mnuih ƀuôn sang, bi êdah klei mprăp mtrŭt mđĭ hdră bi hgŭm bruă hiu čhưn ênguê lehanăn bi hgŭm bruă êlan êa ksĭ hŏng Việt Nam kñăm ba yua jih klei găl mơ̆ng dua ala čar. Khua gĭt gai Đảng Nguyễn Phú Trọng ăt bi trông hŏng Khua knŭk kna Malaysia kơ boh tŭ mđĭ kyar bruă duh mkra – ala ƀuôn mơ̆ng Việt Nam, mñăklă hdră mtrŭn mơ̆ng Việt Nam dlăng myuôm lehanăn čang hmăng mđĭ hĭn klei bi mjĕ ƀĭng hgŭm phŭn hŏng Malaysia, mtă kơ dua tĭng lŏ mđĭ lar hĭn dŭm boh tŭ dưi mâo, mđĭ boh tŭ klei bhiăn hgŭm bruă, hlăm anăn mđĭ klei bi mjĕ plah wah anôk bruă Đảng, mtrŭt mđĭ hdră bi hgŭm dua nah ăt msĕ mơh hlăm ASEAN lehanăn dŭm klei kƀĭn trông hlăm krĭng, tar rŏng lăn./.

H’Nêč pô mblang