VOV4.Êđê - Aguah hruê 27/4, ti Anôk bruă Đảng gưl dlông, Khua anôk gĭt gai hdră gang mkhư̆, bi kdơ̆ng hŏng klei ƀơ̆ng ngăn, klei ngă amâo djŏ (Anôk bruă gĭt gai) mkŏ mjing leh Klei bi kƀĭn hŏng klei gĭt gai mơ̆ng Khua gĭt gai Đảng Nguyễn Phú Trọng, Khua anôk bruă gĭt gai čiăng bi trông, brei klei blŭ msir mghaih dŭm boh klei djŏ tuôm Anôk bruă gĭt gai ksiêm dlăng mơ̆ng leh Klei bi kƀĭn tal 21 mơ̆ng Anôk gĭt gai truh kơ ară anei, bi mklă bruă klam hlăm hdră gang mkhư̆, bi kdơ̆ng hŏng klei ƀơ̆ng ngăn, klei ngă amâo djŏ hlăm wưng ti anăp. Mơ̆ng akŏ thŭn truh kơ ară anei, hdră gang mkhư̆, bi kdơ̆ng hŏng klei ƀơ̆ng ngăn, klei ngă amâo djŏ dôk mâo klei mđing dlăng, gĭt gai, mtrŭt mđĭ hluê ngă ba wĭt leh boh boh tŭ dưn. Kơ bruă klam hlăm wưng ti anăp, Anôk gĭt gai mtă kơ dŭm gưl bruă Đảng, êpul bruă Đảng. anôk bruă djŏ tuôm brei mtrŭt mđĭ hĭn hŏng klei gĭr ngă bruă kjăp, mjêč, amâo mdei hlăm hdră gang mkhư̆, bi kdơ̆ng hŏng klei ƀơ̆ng ngăn, klei ngă amâo djŏ, pral msir mghaih klei ƀơ̆ng ngăn, klei ngă amâo djŏ, toh hroh hlăm klei mĭn hlăm phung knuă druh, Đảng viên./.

H’Nêč pô mblang