VOV4.Êđê- Aguah mbruê 17/8, ti anôk bruă Đảng gưl dlông, Khua gĭt gai Đảng Nguyễn Phú Trọng gĭt gai leh klei kƀĭn tal 22 mơ̆ng êpul gĭt gưl dlông kơ bruă gang mkhư̆ klei ƀơ̆ng ngăn, klei amâo mâo jăk, ksiêm wĭt klei ngă bruă hlăm 6 mlan akŏ thŭn, bi klă bruă klam 6 mlan kmhal jih thŭn 2022. Khua gĭt gai Đảng Nguyễn Phú Trọng mñă klă, čiăng kñăm gĭt gai, ktrâo lač, lŏ dơ̆ng mtrŭt mđĭ bruă mkŏ mjing, bi kluôm ênŭm klei kiă kriê “Amâo dưi ƀơ̆ng ngăn”.

Bi kơ bruă klam kñăm hlăm thŭn 2022, êpul gĭt gai mtă kơ dŭm gưl bruă Đảng, êpul bruă Đảng, anôk bruă djŏ tuôm amâodưi luč klei răng, dlăng dưi leh dŭm boh tŭ pô mâo, srăng ktang phĭt, mtrŭt mđĭ ktang hĭn bruă gang mkhư̆ klei ƀơ̆ng ngăn, klei amâo mâo jăk, ƀuah mkra ktang phĭt, hrăm mbĭt plah wah klei bhiăn Đảng, klei ƀuah mkra bruă knŭk kna leh anăn ƀuah mkra klei ngă soh hŏng phung ngă soh, amâo mâo guôn thâo hlei pô anăn, hmao pap mni, mđĭ ai dŭm êpul êya, grăp čô mâo boh tŭ dưn hlăm bruă gang mkhư̆ klei ƀơ̆ng ngăn, klei amâo mâo jăk.

Pô mblang: Y-Ƀel Êban