VOV4.Êđê- Aguah mbruê 17/6, ti gŭ klei gĭt gai mơ̆ng Khua gĭt gai Đảng Nguyễn Phú Trọng, phŭn bruă kđi čar mkŏ mjing klei kƀĭn kluôm ala kơ bruă hyuă kjăp, hluê ngă hdră mtrŭn mrô 12 hruê 16/3/2022 mơ̆ng phŭn bruă kđi čar kơ bruă “Mtrŭt mđĭ mkŏ mjing êpul kahah ksiêm yang ƀuôn ênuah ênô, jhong ktang, thơ̆ng kơ bruă, mrâo mrang, mâo ênŭm hnơ̆ng čoh čuăn hlăm wưng mrâo”.

Khua gĭt gai Đảng Nguyễn Phú Trọng lač klă, čiăng ngă jăk hĭn bruă klam jing êpul kmeh gơ̆ng hlăm bruă răng mgang klei êđăp ênang ala čar, rơ̆ng klei êđăp ênang yang ƀuôn, Đảng, knŭk kna leh anăn mnuih ƀuôn sang čiăng kơ êpul kahah ksiêm yang ƀuôn mâo nanao klei răng, bi lar knhuah gru jhŏng ktang, hing ang, amâo mâo mdei klei gĭr ktưn, găn jih klei dleh dlan, klei lông dlăng, hluê ngă jăk grăp bruă klam mơ̆ng Đảng, knŭk kna leh anăn mnuih ƀuôn sang jao leh. Khua gĭt gai Đảng Nguyễn Phú Trọng mtă kơ êpul kahan ksiêm yang ƀuôn srăng kñăm kơ 5 mta klei, hlăm anăn mâo bruă mkŏ mjing êpul kahan ksiêm mâo klei mĭn kjăp hlăm bruă kđi čar, siă suôr hŏng ala čar, hŏng Đảng, knŭk kna, mnuih ƀuôn sang leh anăn hdră kiă kriê ala čar yang ƀuôn ngă phŭn, kjăp hŏng mta kñăm, klei mĭn cách mạng mơ̆ng Đảng.

Pô mblang: Y-Ƀel Êban