VOV4.Êđê- Aguah mbruê 13/7, ti Hà Nội, knơ̆ng gĭt gai lĭng kahan gưl dlông mkŏ mjing klei kƀĭn ksiêm wĭt boh tŭ bruă gĭt gai hluê ngă bruă klam lĭng kahan 6 mlan akŏ thŭn leh anăn mđĭ kyar bruă klam kñăm 6 mlan knhal jih thŭn 2022. Khua gĭt gai Đảng Nguyễn Phú Trọng, khua hlăm knơ̆ng gĭt gai lĭng kahan gưl dlông gĭt gai klei kƀĭn anei. Blŭ hlăm klei kƀĭn, Khua gĭt gai Đảng Nguyễn Phú Trọng pah mni phung knuă druh, lĭng kahan mâo leh klei bi mguôp, sa ai bi leh bruă klam lĭng kahan 6 mlan akŏ thŭn 2022.

Čiăng ngă jăk bruă klam 6 mlan knhal jih thŭn, Khua gĭt gai Đảng Nguyễn Phú Trọng mtă, knơ̆ng gĭt gai lĭng kahan gưl dlông, phŭn bruă lĭng kahan kñăm gĭt gai, ktrâo lač hluê ngă mâo boh tŭ dưn hdră ngă bruă mơ̆ng hdră mtrŭn klei kƀĭn kluôm bruă Đảng tal 13, hdră mtrŭn bruă Đảng lĭng kahan tal 11. Kñăm gĭt gai, ktrâo lač mđĭ hĭn bruă ksiêm duah, đăo knăl boh klei, čŏng pô, hŏng klei mbruă, hmao kčĕ hŏng bruă Đảng, knŭk kna mgaih msir mâo boh tŭ dưn djăp klei mâo, amâo dưi luč klei răng, mâo klei kjăt kƀla, răng mgang kjăp klei êngiê, klei dưi kiă kriê, hluh hlir ala čar.

Pô mblang: Y-Ƀel Êban