Gưl hruê čuăng truh kơ Việt Nam mơ̆ng Khua gĭt gai Đảng, Khua gĭt gai China Tập Cận Bình leh anăn mô̆ ñu mbĭt hŏng êpul bi ala gưl dlông mơ̆ng Đảng, knŭk kna China mdưm lu klei hmăng hmưi hlăm klei mjĕ giăm dua lăn čar. Anăn jing klei hmăng hmưi kơ kơhưm mrâo, hnơ̆ng mrâo mơ̆ng klei mjĕ giăm dua tĭng Việt Nam – China. Hlăm klei blŭ hrăm, dua tĭng bi trông kơ bruă mđĭ hnơ̆ng kơhưm mrâo kơ klei mjĕ giăm dua tĭng, mtrŭt mđĭ klei bi mguôp hdră êlan kluôm dhuôm dua ala čar nao êlam hĭn leh anăn klă klơ̆ng hĭn. Hlăm 20 thŭn êgao, China jing ƀĭng hgŭm mnia mblei prŏng hĭn mơ̆ng Việt Nam, leh anăn ară anei Việt Nam jing ƀĭng hgŭm mnia mblei prŏng mrô 1 mơ̆ng China hlăm ASEAN, ƀĭng hgŭm mnia mblei prŏng tal 4 mơ̆ng China dlông rŏng lăn (êdei kơ Mi, Japon, Dhŭng Korea).

Hnơ̆ng klei mnia mblei dua tĭng đĭ 9 blư̆ mơ̆ng 20 êklai dolar Mi ti thŭn 2008 truh kơ giăm 180 êklai dolar Mi ti thŭn 2022. Leh 15 thŭn, duh bi liê mơ̆ng China kơ Việt Nam đĭ êbeh 10 blư̆ mơ̆ng 2 êklai dolar Mi ti thŭn 2008 jing 25 êklai dolar Mi ară anei. Gru mngač mkăn hlăm klei mjĕ giăm Việt Nam – China jing klei mjĕ mjuk mnuih ƀuôn sang leh anăn bi mguôp plah wah dŭm alŭ wăl. Truh kơ ară anei, mâo leh giăm 60 čar, ƀuôn prŏng ti Việt Nam mkŏ mjing klei bi mguôp bi hgŭm hŏng dŭm alŭ wăl ti China. Hlăm 10 mlan thŭn anei, Việt Nam drông leh 1 êklăk 300 êbâo gưl čô tuê mơ̆ng China. Klei bi mguôp bi trông plah wah Việt Nam – China hlăm dŭm bruă mbĭt hlăm alŭ wăl leh anăn tar rŏng lăn amâo mâo mdei dưi đĭ kyar.