VOV4.Êđê- Bi hdơr 77 thŭn hruê krĭng Dhŭng Krŭ kdơ̆ng (23/9/1945 - 23/9/2022) – sa gru kruăk knăl hƀuê ênuk jhŏng ktang djuê ana, aguah mbruê 23/9, ti ƀuôn prŏng Hồ Chí Minh, Khua gĭt gai Đảng Nguyễn Phú Trọng gĭt gai leh mmông mă bruă hŏng Êpul khua bruă Đảng leh anăn phung knuă druh kmeh gơ̆ng ƀuôn prŏng kơ bruă hluê ngă hdră mtrŭn klei kƀĭn kluôm bruă Đảng tal 13 leh anăn hdră mtrŭn mrô 11 mơ̆ng bruă Đảng ƀuôn prŏng mơ̆ng akŏ wưng păn bruă truh kơ ară anei.

Khua gĭt gai Đảng Nguyễn Phú Trọng yap yuôm bhăn dŭm klei gĭr leh anăn boh tŭ dưn, dŭm mta bruă dưi mâo mơ̆ng Êpul bruă Đảng, bruă sang čư êa leh anăn mnuih ƀuôn sang ƀuôn prŏng Hồ Chí Minh dưi mâo hlăm wưng êgao. Khua gĭt gai Đảng Nguyễn Phú Trọng lač: wưng kơ anăp ƀuôn prŏng čiăng mtrŭt mđĭ ktang hĭn klei mkŏ wĭt bruă duh mkra ƀuôn prŏng hŏng klei mlih mrâo klei bi hmô mđĭ kyar, kñăm ai dưi tal êlâo kơ bruă hluê ngă tŭ jing dŭm hdră êlan, ruh mgaih klei dleh kpăk hlăm klei kiă kriê, bruă mkŏ mkra leh anăn ai dưi ară anei, bi lar jăk hĭn bruă klam ba anăp, boh kdrŭt mđĭ kyar mơ̆ng pô hŏng krĭng Ngŏ Dhŭng, djŏ jing “Lăn msei, kđông kông”, jing boh tâo hriêl krĭng Ngŏ, klei đăo knang leh anăn hing ang djuê ana.

Pô mblang: Y-Ƀel Êban