VOV4.Êđê - Aguah mbrue (8/2), ti anôk bruă Đảng gưl dlông, Khua gĭt gai Đảng Nguyễn Phú Trọng kiă kriê klei Êpul khua kiă kriê Bruă Đảng Gư̆l dlông bi kƀĭn ksiêm wĭt bruă hlue nga asăp mtrŭn kơ bruă mkŏ mjing tết Nhâm Dần thŭn 2022, lehanăn asăp mtrŭn mơ̆ng khua knŭk kna kơ bruă hyuă kjăp hĭn djăp hdră rơ̆ng kơ bruă drông tết mâo klei mơak mñai, ênuah ênô, êđăp ênang, mkiêt mkriêm.

Phung khua kiă kriê Đảng, knŭk kna nao čuă, hơêč hmưi tết ti 63 boh čar, ƀuôn prŏng, mdudp brei mnơ̆ng kơ phung knŭk kna dlăng ba, mnuih ngă bruă amâo mâo wĭt kơ ƀuôn sang pô ôh, nao čuă, hơêč hmưi tết ti dŭm sa, ƀuôn hlăm knông lăn, kđông răng mgang knông lăn, lehanăn êpul dôk ngă bruă mdrơ̆ng hŏng klei ruă tưp Covid 19, ăt dôk ngă bruă hlăm wưng tết. Klah čŭn klei bi kƀĭn, Khua gĭt gai Đảng lač klă, leh dŭm hrue mdei tết, djăp anôk bruă, êpul êya lŏ dơ̆ng ngă bruă kđi čar pô, pral lŏ wĭt ngă bruă msĕ si hđăp, čiăng kơ jih jang bruă dưi ngă hŏng klei jăk, duh kơ klei hdĭp mda phung ƀuôn sang; amâo mâo lui klei hlăp mbul mdei tết sui hrue ôh, amâo lŏ mđing kơ bruă knuă, ngă hmăi amâo mâo jăk kơ bruă knuă klei duh mkra mnia mblei mơ̆ng phung ƀuôn sang lehanăn phung duh mkra./.

Y-Khem pô mblang