VOV4.Êđê - Tlam mbrue (10/3), ti anôk bruă Đảng gưl dlông, ti gŭ klei kiă kriê mơ̆ng khua gĭt gai Đảng Nguyễn Phú Trọng, phung khua kiă kriê prŏng hlăm Đảng mâo leh klei bi kƀĭn, ksiêm wĭt jih jang bruă hlăm ala čar, kơ boh klei dlông rŏng lăn hlăm dua mlan akŏ thŭn, lehanăn bruă hlăm wưng kơ anăp. Phung khua kiă kriê knơ̆ng lač, hlăm wưng kơ anăp ala čar drei srăng tuôm hŏng lu klei dleh dlan, klei lông dlăng, boh nik mơ̆ng leh mâo klei bi blah Ukraine lehanăn Russia, klei kơ prăk luič ênoh, ênoh ênil mnơ̆ng dhơ̆ng đĭ yuôm, boh nik êa săng êa pui, klei ruă tưp dôk dleh. Klah čŭn klei bi kƀĭn, Khua gĭt gai Đảng Nguyễn Phú Trọng mtă, djăp gưl dhar bruă lŏ dơ̆ng mă bruă bi kjăp, kiă kriê jih jang bruă knuă hlăm klei tŭ jing. Mơ̆ng anăn, mđing ngă dŭm hdră gang mkhư̆ klei ruă tưp, mâo bruă čuăn kơrŭ wĭt bruă duh mkra ala ƀuôn, ktue ksiêm boh klei dlông rŏng lăn, rơ̆ng kơ klei êđăp ênang kơ klei hdĭp, lehanăn ngăn dŏ, klei tŭ dưn djŏ klei bhiăn kơ phung ƀuôn sang pô; lŏ dơ̆ng kiă kriê kjăp bruă bi kdơ̆ng hŏng klei ƀơ̆ng ngăn, klei ngă soh./.

Y-Khem pô mblang