VOV4.Êđê -  Tlam mbrue (8/7), ti anôk bruă Đảng gưl dlông, ti gŭ klei kiă kriê mơ̆ng khua gĭt gai Đảng Nguyễn Phú Trọng, Phŭn bruă kđi čar, Êpul khua kiă kriê bruă Đảng mâo leh klei bi kƀĭn, ksiêm kơ dŭm bruă prŏng kơ lăn čar, kơ boh klei dlông rŏng lăn hlăm 3 mlan gưl 2, lehanăn 6 mlan akŏ thŭn, lehanăn bruă phŭn hlăm wưng kơ anăp.

Phŭn bruă kđi čar lač hlăm wưng kơ anăp ala čar drei hlăk lŏ tuôm hŏng lu klei dleh dlan, klei lông dlăng, srăng ngă êmưt hĕ bruă lŏ kơrŭ wĭt klei duh mkra, kyua djăp mta klei dleh dlan dôk dleh dưi thâo mkă tĭng, boh nik mơ̆ng klei duh mkra dlông rŏng lăn lehanăn klei bi blah plah wah Russia lehanăn ukraine adôk dleh thâo tĭng knăl, lehanăn klei amâo mâo thâo bi djŏ plah wah dŭm ala čar prŏng knư̆ hrue knư̆ đĭ hĭn, klei prăk luič ênoh, klei êa săng, êa pui đĭ ênoh, anăp srăng bi hrŏ hdră êlan ngăn prăk ti lu ala čar, bruă mkă dlăng, mdrao mgŭn tuôm hŏng lu klei dleh dlan mơh. Phŭn bruă kđi čar, Êpul khua kiă kriê bruă Đảng mtă kơ dŭm phŭn dhar bruă mkŏ mjing bi kjăp bruă, hâo hưn hlue ngă bi pral dŭm hdră mtrŭn tal 5 mơ̆ng Êpul khua kiă kriê Đảng gưl dlông gưl 13./.

Y-Khem pô mblang