­Mprăp kơ klei kƀĭn kluôm bruă Đảng kluôm ala gưl tal 14 mĭn tĭng mkŏ mjing ti mlan 1/2026 hlăm klei kƀĭn tal 8 Êpul khua bruă Đảng gưl dlông gưl 13 mrâo anei bi klă mkŏ mjing 5 êpul bruă, hlăm anăn mâo Êpul bruă čih hră. Êpul bruă anei mâo bruă klam Hưn mdah bruă kđi čar leh anăn hưn mdah ksiêm wĭt 40 thŭn mlih mrâo hưn mdah hŏng Klei kƀĭn kluôm tal 14 mơ̆ng Đảng.

Čiăng đru bruă kơ êpul bruă čih hrăm, Êpul khua bruă Đảng ăt bi klă mkŏ mjing êpul čih mkra hdră mơar, truh kơ ară anei, Êpul khua êmua hlăm êpul bruă mâo leh klei bi trông, brei klei blŭ mguôp, bi tŭ ư hŏng dŭm hdră bhiăn, hdră êlan ngă bruă leh anăn klei dăp bruă mă mơ̆ng Êpul čih mkra…Blŭ hlăm klei kƀĭn, Khua gĭt gai Đảng Nguyễn Phú Trọng mñă ktang, Klei kƀĭn kluôm tal 14 mơ̆ng Đảng jing sa hdră bruă kđi čar yuôm bhăn sơnăk, jing gru kruăk knăl hlăm êlan đĭ kyar mơ̆ng lăn čar drei, Khua gĭt gai Đảng Nguyễn Phú Trọng lač klă, bruă mprăp dŭm mta hră mơar kơ Klei kƀĭn kluôm tal 14 mơ̆ng Đảng, hlăm anăn klei hưn mdah bruă kđi čar jing klei hưn phŭn, mâo bruă klam tă hdră kơ dŭm hră mơar mkăn mơ̆ng Klei kƀĭn kluôm, kyuanăn srăng dưi ngă hŏng klei krah knhâo, ngă jăk, mlih mrâo hlăm hdră ngă bruă, srăng rơ̆ng mâo hnơ̆ng tŭ jăk sĭt, bi êdah ênŭm boh sĭt klei mlih mrâo mơ̆ng lăn čar, rơ̆ng kơ klei tŭ jing mơ̆ng klei kƀĭn kluôm.