Hlăm dŭm klei đru mguôp mơ̆ng Khua gĭt gai Đảng Nguyễn Phú Trọng êdah êdi jing bruă bi kdơ̆ng, gang mkhư̆ klei ƀơ̆ng ngăn, klei amâo mâo djŏ amâodah bruă mkŏ mjing bi klă dŭm hdră bhiăn, klei čuăn hlăm Đảng, đru mguôp prŏng sơnăk, mgaih msir dŭm klei lông dlăng, klei dleh dlan mơ̆ng lăn čar hlăm wưng đĭ kyar mrâo. Pô čih klei mrâo mơ̆ng Sang mđung asăp blŭ Việt Nam mâo klei čih “Khua gĭt gai Đảng Nguyễn Phú Trọng leh anăn dŭm klei đru mguôp yuôm bhăn hlăm bruă cách mạng mơ̆ng Đảng”.

“Klei mjhar pui hlăm kpur” jing hĕ leh boh blŭ mưng yua hlăm yang ƀuôn lač kơ bruă bi kdơ̆ng hŏng klei ƀơ̆ng ngăn, mâo Đảng dôk ngă lehanăn Khua gĭt gai Đảng Nguyễn Phú Trọng jing pô kiă kriê mơ̆ng hlăk wưng pan bruă klei bi kƀĭn prŏng 11 truh ară anei.

Nai prŏng, nai prĭn Lê Văn Cường, K’iăng khua anôk bruă ksiêm duah kơ bruă mkŏ mjing Đảng, hlăm sang hră ksiêm hriăm kơ bruă kđi čar Hồ Chí Minh gưl ala čar amâo mâo wơr ôh dŭm êa ală khua gĭt gai Đảng Nguyễn Phú Trọng hlăm wưng bi ruĕ klei bi kƀĭn gưl dlông 6 gưl 11, hrue 15 mlan 10 thŭn 2012. Anăn jing êa ală klei hƀlŏk mơ̆ng sa čô jing pô mâo klei đua klam prŏng hĭn hlăm Đảng, ti anăp mnuih ƀuôn sang leh klei “amâo mâo djŏ ƀiă ôh phung knuă druh, đảng viên” toh hroh klei mĭn, ngă lu klei amâo mâo djŏ. Êa ală anăn mjing leh ai ktang, kut kat hlăm kluôm Đảng, jih jang mnuih ƀuôn sang hlăm bruă bi kdơ̆ng hŏng klei ƀơ̆ng ngă, klei amâo mâo djŏ:

leh pŏk bruă bi kdơ̆ng hŏng klei ƀơ̆ng ngăn, klei amâo mâo djŏ, snăn khua gĭt gai Đảng Nguyễn Phú Trọng kbiă êa ală. Ya ngă? Kyuadah khua gĭt gai lač leh, drei bi kdơ̆ng hŏng klei ƀơ̆ng ngăn, klei amâo mâo djŏ, jing klei drei čăm hlăm drei pô, ƀuh jing ruă, amâo mâo čiăng dưn mơh ăt čăm mơh hŏng mah jiăng ƀĭng ngă bruă mbĭt, kăn čiăng rei sa čô lĕ hlăm klei bi kmhal. Ƀĭng ngă bruă mbĭt hŏng pô tăm lĕ hĕ hlăm klei ngă amâo mâo djŏ, snăn bi kut kat mkra hĕ bi jăk mtam, amâo mâo anôk kăm biăt, ñĕ đuĕ ôh, wăt hŏng hlei pô dưn. Tinei, khua gĭt gai mgei ai tiê ƀuh jing jih jang amâo mâo pô kdŭn ôh, gĭr ktĭr bi kdơ̆ng hŏng klei ƀơ̆ng ngăn, amâo mâo klei êdu ai, amâo mâo klei duah ngă mă snăn ôh, ƀiădah ngă hŏng klei ktang. Mâo msĕ snăn kơh jing năng bi leh bruă Đảng lehanăn mnuih ƀuôn sang jao.

Jing “Knơ̆ng khua kiă kriê”- Khua êpul gĭt gai, Khua gĭt gai Đảng Nguyễn Phú Trọng mđrăm mbĭt hŏng mnuih ƀuôn sang nao hlăm bruă bi kdơ̆ng hŏng klei ƀơ̆ng ngăn, hŏng bruă ngă amâo mâo klei mdjĕ, amâo mâo klei kdŭn ôh. Knŏng tĭng mă akŏ wưng akŏ wưng păn bruă mơ̆ng klei bi kƀĭn prŏng 13 truh ară anei, Êpul khua kiă kriê gưl dlông, Phŭn bruă kđi čar, Êpul khua kiă kriê bruă Đảng mâo phat mkra leh truh 44 êpul bruă đảng lehanăn 164 čô đảng viên, hlăm anăn mâo truh 13 čô dôk hlăm êpul khua kiă kriê gưl dlông, 17 čô khua hlăm êpul kiă kriê gưl dlông êlâo dih, lehanăn 19 čô phung khua kahan gưl grat tướng; 19 čô hlăm êpul khua kiă kriê gưl dlông, lehanăn khua hlăm phŭn bruă kđi čar brei mdei bruă. Klei anei brei ƀuh Khua gĭt gai Đảng Nguyễn Phú Trọng- khădah “ruă ai tiê” ƀiădah dưi lŏ bi kjăp leh ai tiê mnuih ƀuôn sang đăo knang kơ klei Đảng kiă kriê:

Bi kdơ̆ng hŏng klei ƀơ̆ng ngă, mâo Đảng gĭt gai, djă akŏ jing khua gĭt gai Đảng Nguyễn Phú Trọng mâo ngă leh bŏ hŏng klei kjăp. Drei ngă hŏng klei kut kat, ktang, bi kdơ̆ng hŏng jih ai tiê, mđrăm mbĭt hŏng mnuih ƀuôn sang bi kdơ̆ng hŏng klei ƀơ̆ng ngăn. Kâo đăo sĭt, hŏng bruă dôk ngă ară anei klei bi kdơ̆ng hŏng ƀơ̆ng ngăn ti Việt Nam ti gŭ klei gĭt gai mơ̆ng Đảng amâo mâo klei srăng lŏ kdŭn ôh.

Amâo mâo djŏ knŏng hŏng bruă ngă klă mngač drei dưi ƀuh hlăm bruă bi kdơ̆ng hŏng klei ƀơ̆ng ngăn, klei ngă amâo mâo djŏ, khua gĭt gai Đảng Nguyễn Phú Trọng mâo leh klei čih snei “Kut kat, gĭt bi kdơ̆ng hŏng klei ƀơ̆ng ngăn, klei amâo mâo djŏ, đru mkŏ mjing Đảng lehanăn lăn čar drei knư̆ hrue knư̆ doh mngač, kjăp ktang”. Nai prŏng, nai prĭn Vũ Tình, k’iăng khua sang hră gưl prŏng Khoa học Xã hội lehanăn Nhân văn êlâo dih, sang hră gưl prŏng gưl ala čar ƀuôn prŏng HCM lač hdruôm hră anei; jing "giê ktrâo" kơ phung ngă bruă bi kdơ̆ng hŏng klei ƀơ̆ng ngăn, klei amâo mâo djŏ:

 “Gưl hđeh brei mâo klei thâo săng lŏ dơ̆ng bi hriăm mbŏ, mâo klei ktang bi kdơ̆ng hŏng phung bi roh, duah djă hdră bi rŭng bruă bi kdơ̆ng hŏng klei ƀơ̆ng ngăn. Mơ̆ng hdruôm hră anei, gưl phung hđeh mda asei mâo klei thâo săng hĭn bruă klam mơ̆ng pô hŏng lăn čar, hŏng djuê ana, lŏ hriăm mjuăt čiăng bi năng dưi jing pô kiă kriê lăn čar bi mdih”.

Ti gŭ klei kiă kriê mơ̆ng khua gĭt gai Đảng Nguyễn Phú Trọng, bruă bi kdơ̆ng hŏng klei ƀơ̆ng ngăn nao mđrĭng hŏng bruă mprăp mnuih mă bruă. Hŏng mta kñăm djă pioh klei bhiăn êjai, lehanăn bi êdah klei khăp mơh; mơ̆ng wưng păn bruă klei bi kƀĭn prŏng 11 truh ară anei, Đảng mâo leh lu mta mtrŭn klă mngač. Hlăm anăn, bruă “brei mdei”, “amâo lŏ yua” mâo leh hlăm hdră mtrŭn mrô 41 hrue 3/11/2021 cmơ̆ng phŭn bruă kđi čar gưl 13 jing sa hlăm dŭm gru kruak knăl êdah êdi, mâo klei bluh đĭ ktang hlăm bruă bi mguôp kjăp plah wah klei hriăm mjuăt, ngă tui si klei mĭn, knhuah mngač Hồ Chí Minh hlăm klei mkŏ mjing, ƀư̆ mkra Đảng:

Nai prŏng, nai prĭn Tạ Ngọc Tấn, Khua hlăm êpul kiă kriê bruă Đảng gưl dlông êlâo dih, k’iăng khua êpul gơ̆ng bruă hlak mblang gưl dlông lač, ka tuôm mâo ôh wưng Đảng păn kjăp jih jang bruă hră mơar, lehanăn bruă kơ mnuih ngă bruă klă mngač msĕ ară anei. Boh tŭ dưn anăn brei ƀuh ai tiê, klei hur har, klei đua klam mơ̆ng khua gĭt gai Đảng Nguyễn Phú Trọng hlăm dăl 3 wưng pan bruă:

“Lŏ ksiêm wĭt jih jang bruă mơ̆ng dŭm gưl, snăn klei hâo mdah bruă kđi čar mñă sơăi anôk kƀah hlăm bruă mkŏ mjing. Snăn čiăng mâo bruă mkŏ mjing jăk snăn bi mâo klei bhiăn mă bruă kjăp. Êpul khua kiă kriê bruă Đảng gưl dlông dôk ti gŭ klei gĭt gai mơ̆ng Nguyễn Phú Trọng mâo bi leh dŭm hdră mtrŭn, klei bhiăn hlăm klei Đảng mă bruă, dơ̆ng mơ̆ng klei bhĭn mkŏ mjing, hdră mă bruă mơ̆ng dŭm gưl, hlŏng truh kơ jih jang bruă ngă, klei bi mguôp plah wah dŭm anôk bruă... jing kñăm bi leh klei bhiăn hlăm klei ngă bruă mơ̆ng Đảng. Tơdah leh drei mâo sa klei bhiăn kjăp, djŏ guôp, hŏng klei thâo mĭn, lehanăn mâo djăp klei dưi hlăm klei tŭ dưn, snăn mmông anăn yơh bruă klam mơ̆ng klei Đảng, mâo klei tŭ jing jăk hĭn jih jang klei Đảng gĭt gai”.

Hŏng dŭm klei mâo đru mguôp leh yuôm bhăn kơ bruă cách mạng Đảng, jing amâo mâo djŏ êgao đei ôh dưi lač Khua gĭt gai Đảng Nguyễn Phú Trọng jing mnuih pioh kơ bruă mghaih msirr jih jang klei dleh dlan, klei lông dlăng hlăm sa wưng kơ hƀuê ênuk lăn čar.

Drei srăng bi ruĕ klei yăl dliê anei, hŏng klei khua gĭt gai Đảng pô lač, ñu kreh bơ̆k bâo, kreh bi hmô mă Pa-ven Kốp-cha-gin mơ̆ng hdruôm hră klei yăl dliê hing sang “Thép đã tôi thế đấy" mơ̆ng pô čih klei yăl dliê Liên Xô Nhi-cô-lai Ốt-xtơrốp-xki. Anăn ăt jing klei mĭn tui si Khua gĭt gai Đảng Nguyễn Phú Trọng tui tiŏ hlăm jih klei hdĭp ñu:

 “Klei yuôm bhăn êdi mơ̆ng anak mnuih anăn jing klei hdĭp, hdĭp si ngă bi mâo knuih kniêng jăk, kyuadah hlăm klei hdĭp knŏng mâo mă sa blư̆. Brei hdĭp bi năng đăm ôh hƀlŏk êgao mmông leh, kyuadah dŭm thŭn êngŭn mlan hdĭp hlăm klei luič liê hơăi mung măng, đăm ôh lĕ hlăm klei hêñ mlâo, kyua dŭm bruă ngă amâo mâo djŏ, hơăi mang, tuôm hŏng klei lu mnuih mưč mač, tơl leh truh ti mmông knhal tuič, ăt mơak mơh: Tơl jih klei hdĭp, ktuh êyuh leh jih ai tiê klei mĭn, duh myơr kơ bruă knuă jăk siam hĭn hlăm klei hdĭp, kyua bruă bi blah kơ klei êngiê djuê ana, klei êngiê anak mnuih ba wĭt klei jăk yâo kơ mnuih ƀuôn sang!