Jing khua gĭt gai knŭk kna, Khua knŭk kna Phạm Minh Chính mgei ai tiê brei thâo, ñu ktưn hưn leh anăn mâo klei mơak êdi êjai dưi mă bruă hŏng Khua gĭt gai Đảng Nguyễn Phú Trọng hlăm 8 thŭn leh anăn giăm 8 mlan, hlăm dŭm bruă păn mdê mdê, Mơ̆ng khua hlăm Phŭn bruă kđi čar, Êpul khua bruă Đảng, Khua êpul mkŏ mjing gưl dlông, Khua êpul răng mgang, kriê dlăng klei suaih pral knuă druh gưl dlông truh kơ Khua knŭk kna:

“Kâo ktưn hưn leh anăn mâo klei mơak êdi êjai dưi mă bruă hŏng Khua gĭt gai Đảng Nguyễn Phú Trọng, hlăm klei mă bruă leh anăn klei đru, klei uêñ mĭn mơ̆ng ñu kâo ƀuh êdah hĭn kơ dŭm boh klei anei. Tal 1, ñu jing sa čô khua gĭt gai êdah êdi kyua mta kñăm mkŏ mjing lăn čar mdrŏng ktang leh anăn mnuih ƀuôn sang dưi trei mđao, yâo mơak leh anăn mâo ñu mâo kơhưm amâodjŏ knŏng hlăm lăn čar, alŭ wăl, ƀiădah wăt kơ tar rŏng lăn”.

Hlăk dôk hdĭp, Khua gĭt gai Nguyễn Phú Trọng mđing êdi kơ klei mđĭ kyar ti ƀuôn prŏng HCM, tui si klei ñu lač anei jing “Sa anôk yuôm bhăn êdi. Mơ̆ng leh đĭ păn bruă jing khua knơ̆ng kơ klei kiă kriê Đảng, Khua gĭt gai Nguyễn Phú Trọng mâo leh 15 blư̆ nao čuă lehanăn mă bruă hŏng ƀuôn prŏng anei. Klei ñu nao ti gưl knhal tuič jing hlăm hrue 23/9/2022, djŏ hlăm wưng bi hdơr 77 thŭn hrue Kwar dhŭng kgŭ kdơ̆ng.

Čiăng mđrăm mbĭt hŏng kluôm ala ngă tŭ jing mta kñăm truh ti thŭn 2030 ala čar drei srăng jing ala čar đĭ kyar, mâo ênoh hrui wĭt prŏng, truh thŭn 2045 ala čar drei jing ala čar mâo ênoh hrui wĭt kdlư̆n hĭn, lehanăn čiăng kơ mbĭt hŏng dŭm alŭ wăl hlăm krĭng ngŏ kwar dhŭng hlue ngă tŭ jing hdră mtrŭn mơ̆ng phŭn bruă kđi čar, Khua gĭt gai Đảng Nguyễn Phú Trọng mtă:

 “Kâo čang hmang kơ jih jang êpul khua kiă kriê bruă Đảng ƀuôn prŏng mbĭt hŏng jih bruă kđi čar lŏ dơ̆ng ksiêm duah, lehanăn pral mâo mtam hdră êlan mghaih msirr hŏng klei tŭ jing. Ya mta bruă jing êngao kơ klei dưi pô snăn hưn hŏng gưl dlông, hŏng bruă kƀĭn ala, knŭk kna srăng ksiêm, mâo hdră ruh mgaih, mâo klei bhiăn mă bruă, kñăm hgao jih klei dleh dlan, ngă bruă kdlưn hĭn, mkă hŏng hdră mtrŭn mrô 54 mơ̆ng anôk bruă kƀĭn ala gưl XIV”.

Thŭn 2016, Bruă Đảng, bruă sang čư êa leh anăn mnuih ƀuôn sang dŭm djuê ana să Bản Bo, kdriêk Tam Đường, čar Lai Châu hơ̆k mơak dưi drông Khua gĭt gai Đảng Nguyễn Phú Trọng nao čuă. Hluê ngă klei mtă mtă mơ̆ng Awa hlăm gưl nao čuă anăn, knuă druh, đảng viên leh anăn mnuih ƀuôn sang dŭm djuê ana tinei mâo klei hrăm mbĭt, sa ai, gĭt ktưn găn jih klei dleh dlan, kpưn đĭ jing gru mngač hlăm klei mđĭ kyar bruă duh mkra, mkŏ mkra krĭng ƀuôn sang mrâo.

Hạng A Sào, mnuih djuê ana Mông, ti ƀuôn Nà Phát, să Bản Bo, kdriêk Tam Đường brei thâo: Leh dưi bi tuôm leh anăn mâo Khua gĭt gai Đảng Nguyễn Phú Trọng mđĭ ai, gŏ sang ñu hur har jah ênah ngă hma leh anăn pŏk phai ênhă pla mjing čê mơ̆ng gŏ sang.

“Khua gĭt gai Đảng Nguyễn Phú Trọng uêñ mĭn kơ klei hdĭp mda mnuih ƀuôn sang. Ñu hriê dlăng đang pla čê mơ̆ng gŏ sang kâo leh anăn mđĭ ai gŏ sang hŏng mnuih ƀuôn sang gĭr kruê dlăng đang pla čê čiăng mđĭ kyar klei hdĭp mda gŏ sang. Mơ̆ng klei mđi ai anăn, mnuih ƀuôn sang hlăm ƀuôn mâo klei gĭr kriê dlăng leh anăn gĭr ngă bruă pla mjing čê leh anăn ară anei klei hdĭp mnuih ƀuôn sang dưi trei mđao, yâo mơak leh”.