“Lăn čar drei ka tuôm mâo ôh klei găl, kơhưm leh anăn klei ktưn hưn dlông rŏng lăn msĕ si ară anei, mâo thiăm lu klei găl čiăng găl ênưih kjăp ktang hlăm ktuê êlan Đảng drei, mnuih ƀuôn sang drei leh anăn awa Hồ khăp hơiêng ruah leh”.

Anei jing klei Khua gĭt gai Đảng Nguyễn Phú Trọng bi mklă hlăm Klei bi kƀĭn tal sa Anôk bruă Đảng gưl dlông tal XIII leh anăn hlăm lu klei bi kƀĭn yuôm bhăn hlăk Khua gĭt gai Đảng nao leh anăn mâo klei blŭ hrăm gĭt gai yuôm bhăn. Amâo knŏng čiăng lač mă ôh Khua gĭt gai Đảng mñă leh klei anei tơdah boh sĭt brei ƀuh, leh giăm 40 thŭn ngă klei mlih mrâo, mơ̆ng sa lăn čar ƀun ƀin, mâo kdrăp mnơ̆ng anôk bruă nah gŭ – hdră mnêč, anôk bruă nah gŭ kơ klei duh mkra- ala ƀuôn kthŭl mluk, klei thâo ƀiă, truh ară anei, Việt Nam gĭr ktưn jing ala čar dôk đĭ kyar, mâo prăk hrui wĭt man dưn; dhar kreh, ala ƀuôn lŏ dơ̆ng đĭ kyar, klei hdĭp mda mnơ̆ng dhơ̆ng leh anăn ai tiê mnuih ƀuôn sang dưi mđĭ; bruă mkŏ mjing Đảng leh anăn bruă kđi čar mâo klei êdah êdi; êpul bi hgŭm jih jang djuê ana amâo mdei dưi mđĭ; kđi čar, ala ƀuôn hơĭt kjăp, lĭng kahan – klei êđăp ênang, êngiê, klei dưi dưi krơ̆ng kjăp; kơhưm leh anăn klei găl mơ̆ng lăn čar ƀrư̆ dưi mđĭ dlông rŏng lăn.

 Hjăn hlăm bruă hŏng tač êngao nao leh anăn blŭ hrăm gĭt gai hlăm Klei bi kƀĭn hŏng tač êngao kluôm ala Khua gĭt gai Đảng Nguyễn Phú Trọng bi mklă kơ klei mkŏ mjing, mđĭ kyar mơ̆ng Bruă hŏng tač êngao “ana kram Việt nam: phŭn kjăp, asei kjăp, adhan êdai, jiă kma knuih leh anăn kơhưm djuê ana Việt Nam” leh anăn ƀrư̆ mâo ala tač êngao tŭ yap lar ƀar:

“Klă sĭt bruă hŏng tač êngao lŏ dơ̆ng bi êdah klei thâo, knuih hdĭp leh anăn knhuah mơ̆ng bruă hŏng tač êngao Ênuk Hồ Chí Minh leh anăn lŏ čuê knhuah gru krŭ kdơ̆ng jhŏng ktang ƀiădah thâo hdơr knga mơ̆ng djuê ana Việt Nam, lŏ dơ̆ng mlih mrâo mkŏ mjing leh anăn mđĭ kyar bruă hŏng tač êngao Việt Nam mrâo mrang kjăp ktang kluôm jiă kma knhuah jăk siam ana kram.”

 Sa hlăm dŭm gru kruăk knăl dôk mâo hlăm bruă bi kdơ̆ng gang mkhư̆ klei ƀơ̆ng ngăn mơ̆ng akŏ wưng gưl 11 truh ară anei jing bruă mkŏ mjing, ƀư̆ mkra Đảng lŏ dơ̆ng mđĭ ktang mguôp hŏng lu klei blŭ jiă kma mơ̆ng Khua gĭt gai Đảng Nguyễn Phú Trọng, Khua Anôk bruă gĭt gai gưl dlông kơ klei gang mkhư̆ ƀơ̆ng ngăn. Khua gĭt gai Đảng bi mklă, hŏng bruă mkŏ mjing Anôk bruă gĭt gai gưl dlông (hlăm Phŭn bruă kđi čar) truh ară anei, bruă ƀơ̆ng ngăn “jing leh hdră, klei mâo amâo dưi bi mlih ôh”. Kyua anăn, “Djăp knuih mgang, ñĕ, bi mguôp, “ƀăng êgei ñăt kriêp ƀơ̆ng ngăn sun” amâodah ai ngăn, mjhua klei ƀuah ăl čiăng mưč mač kơ pô mkăn, ngă mtŭk mtŭl hlăm êpul mă bruă, jing amâo djŏ ôh.” Hlue si Khua gĭt gai Đảng, mkŏ mjing, ƀư̆ mkra Đảng jing bruă mkŏ mjing êpul bruă, jing bruă anak mnuih, ênưih djŏ kơ klei hdĭp pô, boh tŭ, klei bi mguôp mơ̆ng anak mnuih. Kyua anăn, brei grăo čô drei čŏng ksiêm dlăng, mblang kơ klei jăk, klei ka jăk drei pô; brei ksiêm dlăng kơ pô mkăn. Tơdah amâo čŏng čiăng ngă, kpă ênô, ênuah, djŏ boh klei snăn ênưih ngă ngơi mang, knŏng ƀuh mă klei jăk, klei ktang pô lu hĭn kơ pô mkăn; hlăk êjai knŏng ƀuh klei amâo jăk, klei kƀah pô mkăn lu hĭn kơ pô:

 “Kâo lu blư̆ lač leh, ară anei lŏ mñă kơ hlei pô mâo klei mĭn anei snăn brei lui hĕ sa nah brei kơ pô mkăn ngă, klei hdĭp knŏng hdĭp sa blŭ brei hdĭp čiăng đăm hƀlŏk ôh bruă ngă amâo jăk năng hêñ, prăk mah mâo lu, djiê kăn dưi ba mbĭt rei. Klei hing ang kơ klei hdĭp pô jing klei yuôm bhăn hĭn”

 Hlăm bruă dhar kreh hlăk dôk hdĭp, Khua gĭt gai Đảng Nguyễn Phú Trọng ăt lač klă bruă klam yuôm bhăn mơ̆ng dhar kreh jing tur knơ̆ng ai tiê, boh kdrŭt mđĭ kyar bruă đĭ kyar mơ̆ng ala ƀuôn. Kyua mâo sa bruă dhar kreh jiă kma djuê ana jing tur knơ̆ng, djuê ana drei găn djăp klei dưi dleh dlan, amâo mdei đĭ nanao hlue si klei hƀuê ênuk. Kyua anăn, Khua gĭt gai Đảng Nguyễn Phú Trọng boh nik mtă, jih bruă kđi čar kluôm Đảng, jih jang mnuih ƀuôn sang, jih jang lĭng kahan brei lŏ dơ̆ng thâo săng djŏ hnơ̆ng yuôm bhăn mơ̆ng dhar kreh hlăm hdră gĭt gai cách mạng, Đảng Cộng sản Việt Nam leh anăn Khua gĭt gai Hồ Chí Minh mđĭ bruă klam dhar kreh, dlăng nanao dhar kreh jing sa bruă krŭ kdơ̆ng cách mạng, jing gơ̆ng pui “mtrang mngač êlan kơ ƀuôn sang nao”. Hlăm Klei bi kƀĭn Dhar kreh kluôm ala hlăm hruê 24/11/2021, Khua gĭt gai Đảng Nguyễn Phú Trọng ăt mâo sa klei êmuh kma êlam snăk:

 “Arăng lač anak mnuih mâo dh ar kreh, sa gŏ sang mâo dhar kreh sa djuê ana mâo dhar kreh leh anăn knuih hdĭp dhar kreh, klei blŭ hrăm mâo dhar kreh… bi klei jhat plă plia dŭm bruă ngă soh jing amâo mâo dhar kreh jing bi kdơ̆ng hŏng dhar kreh, klei jăk mơak anak mnuih amâo djŏ knŏng mâo lu prăk mah mnơ̆ng ƀơ̆ng jăk hơô siam ôh ƀiădah jing klei lu jơr kơ ai tiê hdĭp ti krah klei khăp leh anăn klei pap djŏ klă leh anăn kpă ênô”.

 Hlăk dôk hdĭp grăp blư̆ čiăng lač klei blŭ hlăm ai tiê pô, Khua gĭt gai Đảng Nguyễn Phú Trọng khăng lŏ mñă wĭt sa klei blŭ hlăm klei čih hing ang “Msei kma leh hlăm kâo” mơ̆ng pô čih klei duê, klei yăl dliê Liên Xô Nikolai Ostrovsky:

“Klei yuôm bhăn hĭn anak mnuih jing klei hdĭp leh anăn klei hing ang hdĭp, kyua klei hdĭp knŏng hdĭp mă sa blư̆. Brei hdĭp čiăng đăm hƀlŏk ôh kyua dŭm thŭn mlan hdĭp leh, hdĭp hơăi mang; čiăng đăm hêñ kyua bruă ngă amâo jăk, plă plia, arăng mưč mač; tơdah djiê hĕ, drei dưi ktưn hưn lač: Jih jang klei hdĭp drei, drei myơr leh kơ bruă jăk siam hĭn hlăm klei hdĭp- Bruă bi kdơ̆ng mtlaih êngiê djuê ana, mtlaih anak mnuih ba klei jăk mơak kơ yang ƀuôn!”