VOV4.Êđê - Ƀri wưng tết Bun Ti May mơ̆ng ala čar Lào leh anăn tết Chôl Chnăm Thmây ti ala čar Campuchia, Khua gĭt gai Đảng Nguyễn Phú Trọng mâo leh hră hơêč hmưi leh anăn mnga mơĭt kơ Thongloun Sisoulith khua gĭt gai Đảng ala čar Lào, khua lăn čar Lào Hun Sen, khua gĭt gai Đảng yang ƀuôn Campuchia, Khua knŭk kna ala mtao Campuchia. Mta phŭn mơ̆ng hră hơêč hmưi mơ̆ng Khua gĭt gai Đảng Nguyễn Phú Trọng jing bi êdah bruă Đảng, knŭk kna leh anăn mnuih ƀuôn sang Việt Nam mâo klei hơ̆k mơak kơ klei mjĕ giăm prŏng, klei bi mguôp kjăp leh anăn kluôm ênŭm Việt Nam – Lào ƀrư̆ hruê ƀrư̆ đĭ kyar, êlam hĭn, klă klơ̆ng hĭn hlăm djăp mta bruă. Ƀri wưng tết knhuah gru mơ̆ng mnuih ƀuôn sang Campuchia, bi ala kơ Đảng knŭk kna, mnuih ƀuôn sang Việt Nam, Khua gĭt gai Đảng Nguyễn Phú Trọng mâo klei hơêč hmưi kơ Hun Sen leh anăn phung khua gĭt gai Đảng yang ƀuôn Campuchia, knŭk kna leh anăn mnuih ƀuôn sang Campuchia dŭm klei khăp leh anăn klei hơêč hmưi suiah pral, yâo mơak, êđăp ênang leh anăn mdrŏng sah.

 Y- Ƀel pô mblang