VOV4.Êđê - Aguah mbruê, Khua gĭt gai Đảng Nguyễn Phú Trọng ba anăp êpul ngă bruă mơ̆ng gưl dlông mâo leh klei nao čuă leh anăn mă bruă hŏng khua gĭt gai kmeh gơ̆ng čar Hoà Bình kơ boh tŭ bruă luê ngă dŭm bruă klam mơ̆ng akŏ wưng thŭn 2020 – 2025 truh kơ ară anei, mtă kñăm, bruă klam thŭn 2022. Khua gĭt gai Đảng Nguyễn Phú Trọng mbĭt hŏng êpul ngă bruă nao cuă leh knơ̆ng bruă ksiêm duah klei ngă bruă R Việt Nam – Knơ̆ng bruă FDI Japon duh bi liê mkra mjing, mnia mblei ti čar Hoà Bình.

Knơ̆ng bruă mâo ênoh prăk duh bi liê 11 êklăk dolar Mi hŏng giăm 700 čô mnuih mă bruă, prăk hrui wĭt kah knar 8 êklăk prăk kơ sa čô hlăm sa mlan, bi mguôp 10 êklăi prăk kơ ngăn prăk ala čar grăp thŭn. Knơ̆ng bruă thơ̆ng mkra mjing ală kĭng, ala kĭng gưl dlông anei kreh ba čhĭ truh kơ Japon, Malaysia, Hongkong (China) leh anăn Alêmăng. Khua gĭt gai Đảng Nguyễn Phú Trọng mtă, bruă yuôm bhăn tal êlâo hĭn hlăm alŭ wăl ară anei jing gang mkhư̆ klei ruă tưp Covid-19 leh anăn krŭ wĭt, đĭ kyar bruă duh mkra. Khua gĭt gai Đảng Nguyễn Phú Trọng ăt lŏ mtă, čar Hoà Bình čiăng mtrŭt mđĭ wăl duh bi liê, mnia mblei, mđĭ hnơ̆ng tŭ jăk, klei bi lông, bi ktưn mơ̆ng bruă duh mkra leh anăn dŭm knơ̆ng bruă čiăng iêo mthưr, mkăp brei, dưi yua mâo boh tŭ dưn grăp ai dưi kơ klei duh bi liê đĭ kyar.

Y-Ƀel pô mblang