Mơ̆ng leh Klei bi kƀĭn tal 13 mơ̆ng Đảng, boh klei dlông rŏng lăn mâo leh klei bi mlih pral, dleh ktuê dlăng, đăo knăl, ngă kơ bruă hŏng tač êngao Việt Nam tuôm hŏng lu klei dleh dlan, lông dlăng. Khădah snăn, thŭn 2023, 2024 ƀuh leh lu bruă hŏng tač êngao leh anăn jing klei mngač kơ lăn čar. Bruă drei drông Khua gĭt gai Đảng, Khua lăn čar China Tập Cận Bình, Khua mil čhil Mi Joe Biden, Khua gĭt gai Đảng, Khua lăn čar Lào Thoong-lun Xỉ-xu-lít, Khua Đảng yang ƀuôn Cam-pu-chia Hun Sen, Hun Manet, mrâo anei jing Khua mil čhil Russia Putin leh anăn lu phung khua gĭt gai ala čar yuôm bhăn mkăn hriê čhưn ti Việt Nam; bruă Việt Nam hgŭm leh anăn ƀrư̆ hruê mâo bruă klam yuôm bhăn hlăm klei bhiăn lu tĭng msĕ si ASEAN, Êpul hgŭm lu ala čar, Krĭng Mê Công, APEC, AIPA, COP 28… dưi lač jing klei yuôm bhăn hƀuê ênuk, klei đru mguôp bi mklă “ka tuôm mâo ôh ala čar mâo klei găl, kơhưm hŏng tač êngao msĕ si hruê anei”. Mâo klei tŭ dưn anei, anăn jing kyua sa hnơ̆ng trah dlăng leh anăn klei mĭn hŏng tač êngao mdê hjăn mơ̆ng khua gĭt gai ala čar. Anăn jing Khua gĭt gai Đảng Nguyễn Phú Trọng. Lê Hoài Trung, Khua dlăng bruă Đảng, Khua Anôk bruă hŏng tač êngao gưl dlông bi mklă:

  “Dưi ƀuh Nguyễn Phú Trọng dlăng myuôm snăk bruă hŏng tač êngao, hlăm klei blŭ hrăm mñă klă hŏng djăp djuê ana hlăm hdră mkŏ mjing leh anăn mđĭ kyar brei msir mgaih bruă hlăm ala čar leh anăn ala tač êngao, lač klă bruă hŏng tač êngao amâo djŏ knŏng jing klei bi kdung sui hlăm ala čar ôh ƀiădah lŏ jing boh kdrŭt ktang kơ hdră mđĭ kyar ala čar. Sa bruă mkăn jing klei mĭn Khua gĭt gai kơ bruă bi mklă si ngă čiăng ktuê dlăng bruă hŏng tač êngao êngiê, lu tĭng lu jơr, Việt Nam jing ƀĭng găp hŏng jih jang ala čar, jing ala čar đua klam hlăm êpul êya lu ala čar; kjăp klei mĭn, msir mgaih mbruă djăp bruă mâo, păn kjăp pral klei mâo hlăm ala čar leh anăn dlông rŏng lăn. Boh nik ñu mñă klă nanao, tơdah soh kơ êlan srăng ngă soh jih jang”.

 Khua gĭt gai Đảng Nguyễn Phú Trọng mñă klă nanao bruă hŏng tač êngao brei “Kjăp kơ klei bhiăn, mbruă kơ hdră êlan; êdu êun, mâo klei thâo ƀiădah ăt kjăp ktang, jih ai tiê; mbruă ƀiădah ăt mâo klei jhŏng, kjăp ti anăp klei dleh dlan, lông dlăng, kyua klei êngiê kơ djuê ana, kyua klei êngiê, jăk mơak mơ̆ng yang ƀuôn; bi hgŭm, klei khăp ƀiădah gĭr răng mgang boh tŭ ala čar - djuê ana”. Leh anăn bruă hlăm Klei bi kƀĭn hŏng tač êngao kluôm ala thŭn 2021, Khua gĭt gai Đảng Nguyễn Phú Trọng sa blư̆ dơ̆ng mñă klei mĭn: “Bruă hŏng tač êngao Việt Nam brei mbruă, prak leh anăn êdu êun hĭn kơ klei mđĭ kyar bruă duh mkra leh anăn mđĭ kơhưm lăn čar” brei ƀuh klei mđing dlăng leh anăn jing klei khua gĭt gai prŏng hĭn mơ̆ng ala čar dôk bi mĭn hŏng bruă bi hgŭm tač êngao. Mâo lu blư̆, Khua gĭt gai Nguyễn Phú Trọng mñă snei: Ti tluôn phung khua ngă bruă hŏng tač êngao mâo nanao kluôm Đảng, jih jang mnuih ƀuôn sang, lĭng kahan. Anăn jing phŭn agha čiăng kơ phung Khua bi ala hlue ngă jăk bruă klam kdrưh kơang leh anăn bŏ hŏng bruă klam: răng mgang boh tŭ kơ ala čar, djuê ana leh anăn mđĭ ktang klei bi hgŭm lu ala čar, duh kơ klei đĭ kyar bruă duh mkra ala ƀuôn lăn čar.

 K’iăng Nai prŏng, nai prĭn Dương Văn Quảng, Khua hđăp Anôk bruă ksiêm dlăng hŏng tač êngao (Phŭn bruă hŏng tač êngao) brei thâo: Lač kơ Khua gĭt gai Đảng Nguyễn Phú Trọng jing lač kơ gru kruăk knăl mơ̆ng sa čô mnuih “mđĭ ai”, ba boh kdrŭt kơ bruă hŏng tač êngao Việt Nam:

 “Khua gĭt gai Đảng Nguyễn Phú Trọng hlăm grăp blư̆ klei bi kƀĭn hŏng tač êngao mâo nanao klei blŭ mtă mtăn kơ phung knuă druh bruă hŏng tač êngao Việt Nam. Dŭm boh phŭn mtă mtăn anăn jing 1 čô ngă bruă hŏng tač êngao mrâo mrang amâo wơr ôh knhuah gru djuê ana. Bruă hŏng tač êngao brei kčưm mơ̆ng boh tŭ kơ ala čar, mbĭt anăn phung ênuk anei brei mâo klei thâo mrâo, hdră êlan mrâo leh anăn brei ksiêm hriăm. Drei thâo săng phung tač êngao dưi bi trông hŏng digơ̆ Anăn jing klei Khua gĭt gai Đảng mtă mtăn kơ bruă hŏng tač êngao Việt Nam”.

 Bi Khua bi ala Việt Nam ti Russia Đặng Minh Khôi hdơr nanao kơ klei khua gĭt gai prŏng hĭn mơ̆ng ala čar mtă mtăn- anăn jing grăp čô Khua bi ala Anôk bruă Việt Nam ti ala tač êngao brei bi êdah dhar kreh, knhuah mnuih Việt Nam. Boh nik phung ngă bruă hŏng tač êngao brei mđĭ ai tiê bi hgŭm, bi khăp, thâo luă gŭ thâo ktang kjăp, thâo ênuk, thâo kơhưm, thâo kơ pô thâo kơ arăng, thâo êla srăng kdŭn srăng nao phă anăp. Jih jang kyua klei tŭ dưn kơ ala čar, djuê ana:

     "Khua gĭt gai Đảng Nguyễn Phú Trọng lač bruă hŏng tač êngao Việt Nam brei bi êdah dhar kreh, knhuah jăk siam anak mnuih Việt Nam.  Hlăm djăp boh klei, brei kjăp ƀiădah êdu êun msĕ ana kram, mâo nanao ai tiê leh anăn klei mprăp nao phă anăp, wăt tơdah hlăm djăp boh klei ăt kjăp hdră êlan”.

Khua bi ala China Việt Nam Hùng Ba mñă klă: Hlăm dŭm thŭn giăm anei, Việt Nam hlue ngă hdră êlan “Bruă hŏng tač êngao Ana Kram” mbruă kơ hdră êlan, mơ̆ng tur knơ’ng krơ̆ng kjăp klei êngiê, jăk mđĭ kyar klei bi hgŭm hŏng dŭm ala čar dlông rŏng lăn. Bruă hŏng tač êngao mơ̆ng Việt Nam mâo leh klei tŭ dưn yuôm bhăn, mđing mđĭ kyar klei bi hgŭm hŏng dŭm ala čar riêng gah, ala čar prŏng leh anăn dŭm ala čar bi hgŭm mơ̆ng đưm; kjăp ai tiê nao ai hŏng klei mĭn lu tĭng.

Dŭm boh tŭ anăn mâo gru kruăk knăl mơ̆ng “pô mđĭ ai” - Khua gĭt gai Đảng Nguyễn Phú Trọng. Leh anăn klei mĭn mơ̆ng ñu srăng lŏ dơ̆ng jing boh kdrŭt hŏng tač êngao Việt Nam găn djăp klei dleh dlan, lông dlăng, amâo kdŭn tluôn ti anăp nklei gun kpăk hlăm sa rŏng lăn mâo lu boh klei msĕ si ară anei./.