VOV4.Êđê - Tlam bruê 20/5, ti anôk bruă Đảng gưl dlông, Khua gĭt gai Đảng Nguyễn Phú Trọng tŭ drông leh khua bruă kƀĭn ala Singapore Tan Chuan-jin leh anăn êpul bi ala bruă kƀĭn ala Singapore dôk hriê čuă ala čar Việt Nam. Khua bruă kƀĭn ala Tan Chuan-jin bi êdah klei hơ̆k mơak kyua gưl tal êlâo hriê čuă, ktuê dlăng dŭm boh tŭ yuôm bhăn hlăm klei đĭ kyar bruă duh mkra ala ƀuôn Việt Nam. Khua bruă kƀĭn ala Singapore hâo hưn hŏng Khua gĭt gai Đảng Nguyễn Phú Trọng kơ boh tŭ klei blŭ hrăm hŏng Khua bruă kƀĭn ala Vương Đình Huệ, hlăm anăn mâo 2 mta bruă 2 tĭng bi klă kơ klei bi mguôp, mđĭ hĭn klei bi trông, klei bi tuôm phung khua êmua, klei bi mguôp plah wah dŭm anôk bruă, kah mnha klei thâo hlăm dŭm klei ngă bruă mơ̆ng bruă kƀĭn ala 2 ala čar leh anăn bi mguôp hlăm dŭm klei kƀĭn tar rŏng lăn. Khua gĭt gai Đảng Nguyễn Phú Trọng bi mni klei hriê čuă ala čar Việt Nam mơ̆ng khua bruă kƀĭn ala Singapore, bi êdah klei đăo knang klei hriê čuă anei jing tur knơ̆ng yuôm bhăn hlăm wưng 2 ala čar dôk mđing truh bi hdơr 50 thŭn hruê mkŏ mjing klei mjĕ giăm bruă hŏng tač êngao leh anăn 10 mkŏ mjing ƀĭng hgŭm hdră êlan plah wah 2 ala čar ti thŭn 2023.

    Y-Ƀel pô mblang