VOV4.Êđê - Tlam mmăt mbruê, 20/4, Khua gĭt gai Đảng Nguyễn Phú Trọng tŭ drông leh khua gĭt gai Hạ Viện India Om Birla leh anăn êpul bi ala Nghị Viện India klă klơ̆ng hriê čuă ala čar Việt Nam leh anăn yap yuôm bhăn klei đĭ kyar jăk siam mơ̆ng klei mjĕ giăm 2 ala čar, lač klei hriê čuă mơ̆ng khua gĭt gai Hạ viện Om Birla gưl tal anei jing yuôm bhăn êdi, boh nik hlăm wưng 2 ala čar bi hdơr 50 thŭn hruê mkŏ mjing klei mjĕ giăm bruă hŏng tač êngao hlăm thŭn anei, đru bi kjăp leh anăn mđĭ hĭn klei bi mguôp hdră êlan kluôm ênŭm 2 ala čar.

Khua gĭt gai Đảng Nguyễn Phú Trọng tŭ ư hŏng klei mñă brei mtrŭt mđĭ klei bi mguôp mơ̆ng khua gĭt gai Hạ Viện India, mtă kơ 2 ala čar lŏ dơ̆ng bi mguôp leh anăn kah mbha klei thâo kñăm bi êlam hĭn klei mjĕ giăm bi mguôp kluôm ênŭm. Khua gĭt gai Đảng Nguyễn Phú Trọng ăt mñă kơ 2 tĭng lŏ dơ̆ng bi trông, ksiêm êmuh leh anăn bi mguôp kjăp hĭn hlăm dŭm klei kƀĭn nghị viện tar rŏng lăn.

Y-Ƀel pô mblang