Hlăm mmông tŭ drông, Khua gĭt gai Đảng Nguyễn Phú Trọng mñă klă: Đảng, knŭk kna leh anăn mnuih ƀuôn sang Việt Nam hmăng hmưi mtrŭt mđĭ klei bi mguôp hŏng Mongol jing ala čar ƀĭng hgŭm knhuah gru ƀrư̆ hruê ƀrư̆ đĭ kyar klă klơ̆ng hĭn hlăm djăp mta bruă, djŏ guôp hŏng boh tŭ, klei găl leh anăn klei čiăng mơ̆ng dua ala čar. Khua gĭt gai Đảng Nguyễn Phú Trọng bi êdah klei đăo knang gưl hriê čuă Việt Nam mơ̆ng Khua mil čhil Mongol srăng đru mtrŭt mđĭ hĭn klei mjĕ giăm knhuah gru plah wah 2 ala čar, boh nik hlăm wưng dua ala čar dôk mđing truh bi hdơr 70 thŭn mkŏ mjing klei mjĕ giăm ti thŭn 2024.

Mơ̆ng tur knơ̆ng bi hgŭm knhuah gru jăk siam, Khua lăn čar lač, hlăm wưng kơ anăp, klei bi hgŭm Việt Nam - Mongol srăng lŏ dơ̆ng mđĭ kyar jing jar bi hgŭm mrâo. Khua lăn čar Võ Văn Thưởng lač, klei bi hgŭm plah wah dua ala čar Việt Nam - Mongol dôk đĭ kyar jăk, mâo lu klei tŭ dưn mrâo hlăm wưng giăm anei, boh nik dŭm boh tŭ hlăm klei kđi čar, lĭng kahan, klei êđăp ênang leh anăn bruă duh mkra. Čiăng ba klei bi hgŭm dua ala čar mđĭ kyar êlam, klă sĭt leh anăn tŭ dưn hĭn hlăm wưng kơ anăp, Khua lăn čar brei thâo bi tŭ ư hŏng Khua mil čhil Mongol lu hdră msir yuôm bhăn, hlăm anăn tŭ ư mđĭ hdră kñăm mđĭ prăk hrui wĭt mnia blei dua nah truh 200 êklăk USD hlăm wưng kơ anăp. Êlâo anăn, Khua lăn čar Võ Văn Thưởng leh anăn Khua mil čhil Mongol dlăng klei bi siñê hră mơar bi hgŭm plah wah dŭm phŭn, dhar bruă dua ala čar.