Khua gĭt gai Đảng Tô Lâm mâo klei mơak dưi bi tuôm hŏng Tony Blair; bi mni kơ dŭm klei gĭr mơ̆ng Tony Blair hlăk dôk ngă khua knŭk kna Angle êlâo dih, lehanăn bruă Tony Blair dôk ngă ară anei hlăm klei hgŭm mbĭt Việt Nam- Angle.

Khua gĭt gai Đảng Tô Lâm mñă Việt Nam dlăng yuôm klei bi mguôp kluôm dhuôm hŏng Angle, hlăm anăn mâo klei hgŭm bi mlih mrô, lehanăn kơ klei kiă kriê bruă kluôm, jing leh dŭm kmeh gơ̆ng đru mđĭ klei bi hgŭm dua ala čar čhuang nao hlăm ênuk gưl mrâo jăk hĭn. Khua gĭt gai Đảng čang hmăng kơ anôk hgŭm bruă Tony Blair lŏ dơ̆ng jing kdrông mkŏ klei bi hgŭm plah wah dŭm knơ̆ng dhar bruă, phung duh mkra lehanăn anôk bruă ksiêm duah, mbĭt hŏng dŭm boh sang hră gưl prŏng mơ̆ng dua ala čar, boh nik hlăm klei bi mlih mrô, klei duh mkra mrô, mđĭ kyar kjăp, bruă pui kmlă doh, bruă mjuăt bi hriăm klei mdrao mgŭn./.