Mñă klă, prăk bi liê mđĭ kyar hlăm wưng kơ anăp jing prŏng snăk, klei kčah jing brei yua prăk bi liê tŭ dưn, amâo brei mâo klei ƀơ̆ng ngăn, luč liê mang, Khua gĭt gai Đảng Tô Lâm mtă kơ gưl bruă Đảng, êpul bruă đảng, anôk bruă djŏ tuôm kƀĭn gĭt gai pŏk ngă tŭ dưn bruă klam, hŏng klei mĭn jing gĭr, blŭ ƀiă ngă lu, mjing klei bi mlih klă sĭt čiăng kơ mnuih ƀuôn sang ƀuh, mnuih ƀuôn sang sa ai.

  Brei mđing kơ bruă klam hlăm wưng kơ anăp, Khua gĭt gai Đảng Tô Lâm mtă brei kƀĭn hlue ngă klei bhiăn dŭm hdră êlan, klei mĭn; mđĭ ksiêm dlăng klei dưi bi mguôp bi leh bruă sang čư̆ êa alŭ wăl dua gưl; mđĭ pral ksiêm dlăng, msir mgaih bi jih klei mâo mnuih ƀuôn sang mđing. Khua gĭt gai Đảng Tô Lâm ăt mtă brei mđĭ ktang hdră gang mkhư̆ klei ƀơ̆ng ngăn, luč liê mang, amâo jăk mguôp hŏng klei čiăng mđĭ kyar.