Blŭ hrăm bi klă hlăm klei kƀĭn, Khua gĭt gai Đảng Tô Lâm lač klă 4 hdră êlan prŏng čiăng kơ Êpul gĭt gai leh anăn dŭm phŭn dhar bruă alŭ wăl čiăng ngă hlăm wưng kơ anăp, hlăm anăn bi klă mta kñăm mđĭ kyar klei mrâo mrang hdră êlan nao mbĭt hŏng hdră êlan mđĭ kyar lăn čar, boh tŭ dưn mơ̆ng lăn čar.

Khua gĭt gai Đảng Tô Lâm mñă brei mlih mrâo ktang gru hmô ngă bruă, bi klă bruă klam pô ba anăp, mbĭt anăn mtrŭt mđĭ klei mlih mrâo mbruă, đru kơ knơ̆ng bruă čô̆ kơ bruă hŏng klei mbruă, knơ̆ng bruă kreh knhâo leh anăn mrâo mrang, mkŏ mjing dŭm anôk bruă mlih mrâo djăp ai ktang, pŏk mlar, mbruă čiăng mkŏ klei ksiêm duah anôk mnia mblei. mbĭt hŏng klei čuăn, ksiêm dlăng, mkra mlih, mkŏ mjing hdră mtô mjuăt mnuih mă bruă hnơ̆ng jăk đru kơ klei mđĭ kyar kdrăp mrâng, Khua gĭt gai Đảng Tô Lâm mñă ktang, wăt bruă kđi čar srăng ngă bruă ktang hĭn, tŭ dưn hĭn. Klei lăn čar čiăng êdi mmông anei amâodjŏ knŏng klei gĭr bruă kđi čar, ƀiădah jing boh tŭ dưn klă klơ̆ng, jing klei mlih klă sĭt mơ̆ng bruă kđi čar, êpul êya anôk bruă duh mkra, êpul phung hriăm lu, phung kreh knhâo leh anăn kluôm yang ƀuôn.