Khua knŭk kna mtă kơ dŭm phŭn, dhar bruă, alŭ wăl gĭr, mbruă, tŭ dưn hĭn hlăm klei pŏk ngă bruă knuă, msir mgaih klei gun kpăk, mơ̆ng tur knơ̆ng păn kjăp klei gĭr gai mơ̆ng Phŭn bruă kđi čar, Bruă kƀĭn ala, Knŭk kna. Hlăm anăn, bi leh hnơ̆ng čuăn kčah, hnơ̆ng kčah, hdră, mơ̆ng tur knơ̆ng hnơ̆ng čuăn lu ala čar ƀiădah djŏ guôp hŏng klei mdê hjăn Việt Nam čiăng mâo tur knơ̆ng pŏk ngă hrăm mbĭt, sa anăn kluôm ala. Bi leh hră mơar bi liê, dăp prăk bi liê ngă djŏ klei čiăng, hnơ̆ng ngă, mbĭt anăn gĭr gang mkhư̆ klei ƀơ̆ng ngăn, klei amâo jăk, klei tŭ dưn êpul.

Khua knŭk kna mtă kơ dŭm alŭ wăl kƀĭn gĭt gai msir mgaih anôk ala, lŏ dăp anôk dôk, rơ̆ng pral, hmao, klei hdĭp mda mnuih ƀuôn sang ti anôk dôk mrâo jăk hĭn kơ anôk hđăp, rơ̆ng anôk bruă nah gŭ djăp ênŭm, kriê dlăng bruă knuă, hdră duh ƀơ̆ng mnuih ƀuôn sang. Khua knŭk kna jao kơ Phŭn bruă ngăn prăk mjêč ktuê dlăng, bi mklă Hdră bruă lŏ bi mlih Knơ̆ng bruă êlan êdeh treng Việt Nam; Phŭn bruă tuh tia mnia blei bi leh hră mơar čiăng hưn mdah bi mklă Hdră bruă mđĭ kyar bruă mkra mjing êlan êdeh treng hlăm mlan 3 thŭn 2026, mbĭt anăn lŏ dơ̆ng kčĕ klei bhiăn,  hdră êlan hŏng gưl mâo klei dưi./.