Aguah 5/12, Khua gĭt gai Đảng Tô Lâm gĭt gai mmông mă bruă hŏng Anôk dlăng bruă Đảng čar Ninh Thuận kơ boh tŭ hlue ngă Hdră mtrŭn klei bi kƀĭn tal 13 mơ̆ng Đảng leh anăn Hdră mtrŭn klei bi kƀĭn bruă Đảng čar tal 14 wưng 2020-2025; kơ bruă mkŏ mjing ksiêm dlăng, pŏk ngă Asăp mtrŭn mơ̆ng Phŭn bruă kđi čar leh anăn hră mơar mơ̆ng gưl dlông leh anăn hdră pŏk ngă hdră êlan bi liê bruă pui kmlă hạt nhân Ninh Thuận hlăm wưng êgao.

Khua gĭt gai Đảng Tô Lâm bi mklă mnuih ƀuôn sang Ninh Thuận leh anăn dŭm alŭ wăl riêng gah kah mbha, pioh klei găl lăn ala, ngăn dŏ čiăng mđĭ kyar hdră bruă pui kmlă pioh kơ klei mđĭ kyar kluôm ala, klă sĭt srăng dưi lŏ mbha, dưi dưn boh tŭ năng hŏng klei đĭ kyar. Đảng leh anăn Knŭk kna srăng rơ̆ng ruah kdrăp hạt nhân jăk hĭn, ruah phung hgŭm kčĕ jăk hĭn, mtô bi hriăm mnuih mă kriê dlăng jăk hĭn čiăng rơ̆ng bruă dŭ mdiăng êđăp ênang leh anăn tŭ dưn hdră bruă pui kmlă anei mơ̆ng ala čar, amâo djŏ knŏng kyua ênuk ară anei ôh ƀiădah wăt kơ ênuk anak čô êdei anăp.