Dŭm thŭn êgao, klei mjĕ giăm Việt Nam - Finland dưi đĭ kyar jăk siam, Finland dlăng kơ Việt Nam jing ƀĭng hgŭm mrô 1 ti Ngŏ Dhŭng Asi. Gưl nao čuă tal anei jing gru kruăk yuôm bhăn, mñă klă klei đăo knang bruă kđi čar leh anăn pŏk sa wưng mrâo bi mguôp dua ala čar.

Việt Nam leh anăn Finland lŏ dơ̆ng bi kjăp klei bi mguôp hlăm bruă phŭn msĕ si mtô mjuăt bi hriăm, kreh knhâo mrâo mrang, wăl hdĭp mda, bruă lŏ hma, mbĭt anăn pŏk mlar truh kơ dŭm mta bruă mrâo msĕ si bi mlih mrô, pui kmlă doh… Anei jing dŭm hdră tă găl guôp hŏng hdră êlan đĭ kyar, ba wĭt boh tŭ dưn kơ mnuih ƀuôn sang dŭm ala čar leh anăn đru mguôp hlăm klei êđăp ênang, bi mguôp, mđĭ kyar ti alŭ wăl ăt msĕ mơh tar rŏng lăn.