Aguah 13/10, ti Ƀuôn prŏng phŭn Hà Nội, Klei bi kƀĭn bruă Đảng Knŭk kna tal Sa, wưng 2025–2030 klă sĭt mphŭn pŏk. Khua gĭt gai Đảng Tô Lâm nao leh anăn lŭ hrăm gĭt gai. Bi ala kơ Phŭn bruă kđi čar, Anôk dlăng bruă Đảng, Khua gĭt gai Đảng bi mni kơ boh tŭ êdah êdi mơ̆ng bruă Đảng Knŭk kna mâo leh hlăm wưng  2020–2025, boh nik hlăm klei gĭt gai bruă mkŏ mjing klei bhiăn, mđĭ kyar bruă duh mkra - ala ƀuôn, gang mkhư̆ klei ruă tưp leh anăn hơĭt kjăp klei hdĭp mda yang ƀuôn.

Khua gĭt gai Đảng mñă klă, bruă Đảng Knŭk kna lŏ dơ̆ng jing gru bi hmô kơ knhuah kđi čar, klei thâo, knhuah hdĭp bruă knuă leh anăn mlih mrâo mbruă; jing anôk phŭn kơ klei bi hgŭm, sa anăn klei mĭn leh anăn bruă ngă hlăm jih jang bruă knŭk kna. Ñu mtă brei mkŏ mjing Đảng klă sĭt doh mngač, kjăp ktang; gĭr gang mkhư̆ klei ƀơ̆ng ngăn, luč liê mang; mđĭ lar bruă klam Knŭk kna “mkŏ mjing mđĭ kyar, kpă mngač, ngă bruă, duh kơ mnuih ƀuôn sang”.

Blŭ pŏk klei bi kƀĭn bruă Đảng knŭk kna gưl tal 1, Khua knŭk kna Phạm Minh Chính mñă ktang, Klei kƀĭn jing bruă kđi čar yuôm bhăn, jing gru kruăk hlăm bruă mkŏ mjing knŭk kna kpă ênô, mkŏ mjing, ngă bruă, kyua lăn čar, kyua ƀuôn sang. Klei kƀĭn mdưm mta kñăm truh thŭn 2020, Việt Nam jing ala čar đĭ kyar, bruă tuh tia mrâo mrang, hnư hrui wĭt kah knar lu, hlăm êpul 30 anôk bruă duh mkra mâo hnơ̆ng GDP prŏng hĭn dlông rŏng lăn.

Klei đĭ kyar bruă duh mkra wưng thŭn 2026 – 2030 srăng pral, hơĭt kjăp, rơ̆ng kơ klei bi kna. Klei kƀĭn bi êdah 10 bruă klam, hdră êlan phŭn, kñăm bi kluôm klei kiă kriê, bi lar ai mkra mjing, iêo jak grăp ai dưi, boh kdrŭt mrâo kơ klei đĭ kyar, mtrŭt mđĭ bruă tuh tia mnia mblei, bi mrâo mrang, dlăng kơ klei mrâo mrang, mlih mrâo mbruă leh anăn mlih mrô jing boh kdrŭt, mkŏ mjing bruă sang hră mơar mrâo mrang, mđĭ kyar mnuih mă bruă hnơ̆ng jăk.