VOV4.Êđê - Ti anôk bruă Êpul hgŭm lu ala čar ti New York, ala čar Mi, Khua gĭt gai Êpul hgŭm lu ala čar António Guterres drông leh Pô bi ala Đặng Hoàng Giang, Khua Êpul Việt Nam ti Êpul hgŭm lu ala čar, Khua gĭt gai António Guterres h’êč hmưi Việt Nam lŏ djŏ ruah hlăm Êpul kiă kriê klei dưi êngiê anak mnuih mơ̆ng Êpul hgŭm lu ala čar wưng thŭn 2023-2025, đăo knang Việt Nam srăng đru mguôp tŭ dưn hlăm bruă mtrŭt mđĭ lehanăn răng mgang klei dưi êngiê anak mnuih.

Khua gĭt gai mñă, Ñu srăng nao čhưn ti Việt Nam ƀri knăm bi hdơr 45 thŭn Hruê Việt Nam mŭt hlăm Êpul hgŭm lu ala čar (1977-2022). Pô bi ala Đặng Hoàng Giang mñă klei yuôm mơ̆ng gưl hiu čhưn mơ̆ng Khua gĭt gai mbĭt anăn mñă klă, Việt Nam ƀuăn srăng đru mguôp klei thâo pô kơ hdră mă bruă mơ̆ng Êpul hgŭm lu ala čar, hlăm anăn mâo bruă mtrŭt mđĭ Mta kñăm mđĭ kyar h’ĭt kjăp, mdrơ̆ng hŏng klei bi mlih yan adiê lehanăn krơ̆ng kjăp klei êđăp ênang tar rŏng lăn./.

VOV TâyNguyên/Pô mblang: H’Nêč Êñuôl