Y -Luyện Niê Kdăm, pô bi ala Bruă kƀĭn ala gưl 10, Khua bruă Đảng čar hđăp čar Dak Lak yăl dliê, jing pô mâo lu klei mlih mrâo ktang phĭt, Khua gĭt gai Đảng Nguyễn Phú Trọng mâo mnuih ƀuôn sang đăo knang leh anăn khăp êdi.

“Luč ñu jing luč sa čô anak êdah êdi mơ̆ng Đảng, mơ̆ng lăn čar, mơ̆ng mnuih ƀuôn sang. Khua gĭt gai Đảng Nguyễn Phú Trọng hriê čuă čar Dak Lak, ñu uêñ mĭn kơ mnuih ƀuôn sang djuê ƀiă, uêñ kơ klei hdĭp mnuih ƀuôn sang, anăn jing klei uêñ mĭn hĭn”.

Hơ̆k mơak leh anăn ktưn hưn êjai mâo 2 blư̆ bi tuô leh anăn mă rup hŏng Khua gĭt gai Đảng Nguyễn Phú Trọng hlăm dŭm hdră bi kƀĭn dŭm êpul čih klei yăl dliê Việt Nam, Nguyễn Hồng Chiến, ti ƀuôn hgŭm Tân Thành, ƀuôn prŏng Ƀuôn Ama Thuôt, čar Dak Lak hdơr kơ knuih kniêng mơ̆ng khua gĭt gai jing sa čô jĕ giăm, klei blŭ êdu êun. Ñu brei thâo, grăp boh blŭ, klei blŭ hrăm mơ̆ng ñu ênưih nao hlăm ai tiê, leh anăn ñu hdơr nanao:

 “Klei mtô êlam hĭn hŏng phung djă giê čih leh anăn čih klei mrâo anăn jing “Čăm kuih đăm bi mčah tŏ”, si srăng dưi mdjiê kuih ƀiădah ăt dưi mgang tŏ mga, jing srăng rơ̆ng kơ klei hơĭt. Pô djă giê čih ăt srăng hriăm leh anăn hluê ngă klei tô mơ̆ng Khua gĭt gai Đảng, si srăng ngă čiăng bi kdơ̆ng hŏng klei amâo mâo jăk ƀiădah dưi ba wĭt klei đăo knang hŏng Đảng, hŏng klei kriê kriê”.

Hdơr kơ klei mtă mơ̆ng Khua gĭt gai Đảng Nguyễn Phú Trọng hlăm klei kƀĭn phung bi ala kluôm ala Êdam êra cộng sản Hồ Chí Minh gưl tal 12, amai H’Hương Ƀuôn Krông, Khua bruă êdam êra ƀuôn prŏng Ƀuôn Ama Thuôt, čar Dak Lak mă anăn jing boh kdrŭt čiăng mjuăt bi hriăm pô. Boh nik, nao êlâo hriăm kơ knhuah hdĭp cách mạng, hriăm hră mơar, mjuăt bi hriăm pô, hlăm klei mă bruă knuă, nao êlâo ngă bruă klam kđi čar:

“Anăn jing boh kdrŭt čiăng kơ kâo lŏdơ̆ng hluê ngă gru mngač Hồ Chí Minh leh anăn Khua gĭt gai Đảng. Hriăm kơ ñu klei jĕ giăm, knhuah kreh kriăng, mkiêt mkriêm, kpă, ênuah. Lŏ dơ̆ng hriăm kơ klei mĭn hdĭp, amâo uêñ kơ klei dleh, klei knap leh anăn gĭr mao klei jhŏng hlăm bruă kđi čar, mâo ai tiê mngač, thâo mĭn, klei hmăng hmưi./.