Jao klei bi mklă lehanăn blŭ hrăm ti knăm anei, Khua gĭt gai Đảng, Khua lăn čar Tô Lâm h’êč hmưi kơ dua knuă druh mrâo mâo Phŭn bruă kđi čar ruah, păn ngă bruă mrâo, mâo: Trần Lưu Quang păn ngă Khua Anôk bruă Duh mkra gưl dlông lehanăn Mai Văn Chính păn ngă Khua Anôk bruă đru čung ba mnuih ƀuôn sang gưl dlông. Khua gĭt gai Đảng, Khua lăn čar Tô Lâm mñă, Trần Lưu Quang lehanăn Mai Văn Chính jing knuă druh dưi mjuăt bi hriăm, đĭ hriê kơ prŏng mơ̆ng nah gŭ, găn lu hdră mă bruă, nao hriăm hlăm lu adŭ mjuăt bi hriăm Gưl dlông, mâo lu klei thâo hlăm hdră đru kčĕ, kiă kriê, dưi mâo lu boh tŭ dưn klă sĭt hlăm bruă mâo kčah jao.

Blŭ ti knăm leh mâo klei bi mklă, Trần Lưu Quang lehanăn Mai Văn Chính bi mklă, anei jing klei ktưn hưn lehanăn ăt jing klei đua klam si srăng ngă čiăng mbĭt hŏng Anôk bruă bi leh jih bruă klam êlâo kơ Klei bi kƀĭn tal XIV mơ̆ng Đảng. Trần Lưu Quang lehanăn Mai Văn Chính čang hmăng, hŏng k’hưm jing Khua Anôk bruă Duh mkra gưl dlông lehanăn Khua Anôk bruă đru čung ba mnuih ƀuôn sang gưl slông srăng lŏ mâo Đảng, Knŭk kna, phung khua kiă kriê lehanăn knuă druh đảng viên dŭm anôk bruă Đảng gưl dlông mđing dlăng, đru, bi hgŭm kjăp hŏng alŭ wăl bi leh jih bruă klam mâo kčah jao./.