Gưl nao čhưn ti ala tač êngao hŏng kơhưm mrâo jing Khua gĭt gai Đảng, Khua lăn čar Tô Lâm tŭ jing jăk siam hlăm djăp mta ra bruă, đru mtrŭt mđĭ yuôm bhăn hlăm bruă mkŏ mkra Êpul êya thâo bi đru hlăm êdei anăp Việt Nam – China mâo boh tŭ yuôm bhăn, đru mguôp kơ klei êđăp ênang, h’ĭt kjăp lehanăn đĭ kyar mơ̆ng krĭng lehanăn tar rŏng lăn.

Hlăm 2 hruê mă bruă, Khua gĭt gai Đảng, Khua lăn čar Tô Lâm mâo leh hdră ngă bruă tŭ yuôm hŏng 18 hdră bruă. Hlăm hdră hiu čhưn, dua tĭng ba mdah leh Klei hưn mthâo mbĭt kơ bruă mđĭ hĭn klei bi mjĕ hŏng hdră êlan bi hgŭm kluôm, mkŏ mkra êpul êya êdei anăp Việt Nam – China. Dŭm phŭn, dhar bruă lehanăn alŭ wăl dua ala čar bi mklă leh lu hră m’ar hlăm bruă ksiêm mkă dlăng, klei mŭt kbiă, bruă mdrao mgŭn, mtô mblang, bi hgŭm alŭ wăl lehanăn hdră đru kơ mnuih ƀuôn sang./.