Amĭ kkiêng lehanăn đĭ hriê kơ prŏng ti alŭ Lại Đà, xã Đông Hội kdriêk Đông Anh, ƀuôn prŏng Hà Nội – hlăm sa boh ƀuôn bŏ hŏng klei hnŭk ênang, hŏng mnuih ƀuôn sang mhač tlao, ƀiădah thâo kreh kruiñ hriăm mjuăt, lehanăn jing anak kluič hlăm sa gŏ sang ngă lŏ hma, mâo lu ayŏng adei. Khua gĭt gai Nguyễn Phú Trọng mâo nanao phung mah jiăng hlăm sang hră hdơr kơ asei mlei điêt, ală mngač, mâo klei thâo gưt asăp, kriăng hriăm mjuăt. Leh păn ngă lu mta bruă mâo Đảng, Knŭk kna lehanăn mnuih ƀuôn sang jao msĕ si:Jing khua hlăm êpul khua kiă kriê bruă Đảng gưl VII truh gưl XIII; Khua hlăm phŭn bruă kđi čar mơ̆ng gưl VIII truh gưl XIII; Khua knơ̆ng kiă kriê anôk bruă klei mrâo Tạp chí Cộng sản; Khua êpul gơ̆ng bruă hlak mblang gưl dlông, Khua bruă Đảng ƀuôn prŏng Hà Nội; Khua bruă kƀĭn ala; Khua lăn čar, Khua gĭt gai Đảng gưl XI truh gưl XIII, Nguyễn Phú Trọng mâo leh lu klei duh myơr yuôm bhăn kơ bruă cách mạng mơ̆ng Đảng lehanăn djuê ana. Đào Duy Quát, K’iăng khua anôk bruă kiă kriê klei hâo hưn gưl dlông êlâo dih lač:

 “Hlăm jih jang bruă ñu păn, Nguyễn Phú Trọng ngă bruă hŏng klei čŏng čiăng, mâo bruă đua klam prŏng hŏng klei thâo hlăk mblang mâo klei mĭn kjăp. Boh nik leh ngă khua gĭt gai Đảng 3 wưng păn bruă mâo leh klei thâo bi mguôp mơ̆ng phŭn bruă kđi čar, Êpul khua kiă kriê bruă Đảng gưl dlông, Êpul gĭt gai Gưl dlông hlŏng truh kơ klei bi sa ai hlăm Đảng.”

Hŏng knhuah hdĭp êdu êun, jĕ giăm hŏng nah gŭ, lehanăn hlăm klei dôk dơ̆ng ƀơ̆ng huă grăp hrue. Hŏng Đảng viên Phùng Huy Đan, ñu ƀuh nanao hlăm Khua gĭt gai jing leh klei bi hmô kơ knhuah dôk dơ̆ng ƀơ̆ng huă hlăm klei thâo luă gŭ, êdu êŭn, jĕ giăm hŏng jih jang mnuih. Êdah êdi êjai ñu nao hlăm 4 klei bi tuôm hŏng mnuih ƀuôn sang ti anôk ruah khua mrô 1 ƀuôn prŏng Hà Nội anôk khua gĭt gai Đảng Nguyễn Phú Trọng jing pô bi ala bruă kƀĭn ala lehanăn truh kơ ară anei, ăt kjăp klei mĭn, Phùng Huy Đan:

 “kâo myun mâo bi tuôm hŏng awa Trọng ti 4 gưl klei bi tuôm hŏng mnuih ƀuôn sang, ñu bi tuôm hŏng mnuih ƀuôn sang bŏ hŏng klei mhač tlao, êjai bi blŭ hrăm ñu kăp mđing hmư̆, čih pioh. Leh blŭ hrăm msĕ mơh, ñu lŏ mñă diih jing phung thâo săng, ksiêm lu mđing bi nik kơ hdră êlan. Kyuanăn brei diih mâo klei thâo đru mguôp hŏng anôk bruă kƀĭn ala, klei diih blŭ hrăm jing jăk lehanăn djŏ, mđrăm mbĭt đru mghaih msirr dŭm klei dôk kƀah. Snăn jih jang mnuih čiăng sơăi mâo mă rup hŏng awa”.

Jing khua kiă kriê prŏng hĭn hlăm Đảng, Khua gĭt gai Nguyễn Phú Trọng mđing leh kơ lu mta klei, mta bruă mdê mdê, dơ̆ng mơ̆ng bruă kreh knhâo, bruă sang hră mơar, hlŏng truh kơ dharr kreh kdŏ muiñ, bruă klei mrâo, mơ̆ng bruă msir klei ư̆ êpa, bi hrŏ klei ƀun ƀin, hlŏng truh kơ klei brei thâo khăp kơ lăn čar hŏng jih jang phung hđeh gưl mrâo... Hlăm ya mta bruă ñu mă, ñu ngă hŏng jih ai tiê sơăi, lehanăn mâo klei đua klam prŏng. Hlăk ñu nao kơ ƀuôn prŏng Hồ Chí Minh lehanăn mâo bi tuôm hŏng mnuih ƀuôn sang ti anăn, Khua gĭt gai mâo klei čang hmăng kơ ƀuôn prŏng Hồ Chí Minh klă sĭt srăng jing ƀuôn prŏng bŏ hŏng klei thâo bi khăp, thâo bi đru, kreh dhar, mnuih ƀuôn sang mâo klei hdĭp trei mđao, jăk mơak, čiăng dưi bi sĭt klei anăn, ƀuôn prŏng năng lŏ mlih mrâo, mđĭ kluôm dhuôm hlăm bruă mjuăt bi hriăm, mjing mnuih thâo mă bruă, thâo kiă kriê, mđĭ bi ktang bruă kreh knhâo – kdrăp mă bruă mrâo mrang hlăm klei mđĭ kảy klei mĭn, mjing atur kơ ƀuôn prŏng mâo klei đĭ kyar pral lehanăn kjăp.

 Bi hŏng anôk bruă Đảng, hŏng mnuih ƀuôn sang djăp djuê ana ti ktue knông lăn Lạng Sơn, Khua gĭt gai Đảng mtă mtăn, hŏng bruă klam jing mnư̆ mnang kơ lăn čar, hlăm bruă răng mgang klei êđăp ênang, răng mgang kjăp klei hnŭk ênang hlăm lăn čar, lehanăn ăt jing ktue roh hlăm bruă duh mkra, bi răng kriê kjăp mơh klei bi mnia mblei, êjai hlăm bruă răng mgang lăn čar, lehanăn klei êđăp ênang bruă duh mkra hlăm lăn čar, čŏng ngă bruă hŏng klei tŭ jing hlăm bruă bi mguôp hŏng ala tač êngao, rŭ mjing sa knông lăn êđăp ênang, ñu kma hŏng ala tač êngao, bi hgŭm mbĭt, mjing anôk jăk kơ bruă mđĭ klei duh mkra ala ƀuôn hlăm čar, hlăm krĭng kngư, krĭng čư̆ čhiăng kwar dưr lehanăn hlăm kluôm ala.

Hŏng ƀuôn prŏng phŭn Hà Nội, amâo mâo djŏ knŏng ai tiê klei khăp hŏng krĭng lăn jing anôk anôk amĭ dở la ama dơr sôk, ƀiădah lŏ jing anôk đĭ hriê kơ prŏng lehanăn mă bruă hŏng anôk jing kboh kơ lăn čar, Khua gĭt gai Đảng Nguyễn Phú Trọng mâo nanao klei mđin prŏng êdi kơ klei mđĭ kyarr ară anei lehanăn kơ êdei anăp. Khua gĭt gai Đảng Nguyễn Phú Trọng tuôm lač leh:

 “Dah lač kơ ƀuôn prŏng phŭn Hà Nội, hlăm ai tiê grăp čô anak mnuih Việt Nam mpŭ mni sơăi kơ krĭgn lăn êbâo thŭn čăt jing lehanăn jhŏng ktang, anôk dharr kreh êđăp ênang, ƀuôn phŭn kơ klei thâo khăp, kơ knhuah anak mnuih, ƀuôn prŏng kơ klei êđăp ênang, kyuanăn khădah đuĕ hiu hlăm tar krĭng lăn, ƀiădah ai tiê ăt hdơr kơ Hà Nội". Klă sĭt msĕ snăn êdi, hlăm jih klei hdĭp mă bruă, kyua lăn čar, kyua mnuih ƀuôn sang” Khua gĭt gai Hồ Chí Minh ăt kah nanao kơ ƀuôn prŏng phŭn Hà Nội sa ai tiê klei khăp yuôm bhăn. Hà Nội ăt jing anôk mâo dŭm klei kruak knăl yuôm bhăn kơ bruă cách mạng mơ̆ng ñu, jing sa hlăm dŭm anôk Khua gĭt gai Hồ Chí Minh hdĭp lehanăn mă bruă sui hĭn, jing leh anôk mâo lu kru jơ̆ng awa, êjai lač kơ Hà Nội, A wa kreh yua boh pia ƀuôn prŏng phŭn drei. Hlăm dŭm hrue tal êlâo ƀuôn prŏng phŭn mâo klei êngiê (10-10-1954), Awa mâo čih leh: "Kluôm ala dôk dlăng kơ ƀuôn prŏng phŭn drei, tar rŏng lăn dlăng kơ ƀuôn prŏng phŭn drei, jih jang drei brei mâo klei gĭr bi răng kriê klei êđăp ênang, mjing kơ ƀuôn prŏng phŭn mâo klei hnŭk ênang sĭt, sa ƀuôn prŏng phŭn hnŭk êngiê, mơak mñai, mâo klei suaih pral kơ asei mlei lehanăn ai tiê, anei yơh jing klei yuôm bhăn, anei mơh jing klei čiăng kơ jih jang mnuih, jih klei mĭn mprăp kơ Hà Nội đĭ kyar sĭt, ba akŏ hlăm djăp mta djŏ hŏng klei Awa Hô lač leh tui si klei ñu čiăng hŏng ƀuôn prŏng phŭn”.

TMơ̆ng dŭm klei đuĕ hiu truh hŏng mnuih ƀuôn sang, nao ksiêm dlăng bruă knuă, kơ klei mĭn mrâo, jih jang klei Khua gĭt gai Nguyễn Phú Trọng mâo bi êdah hŏng Đảng, Knŭk kna hlăm klei čuăl mkă, dŭm hdră êlan, kñăm pral mđĭ kyar bruă duh mkra ala ƀuôn, rŭ mdơ̆ng yang ƀuôn ngă phŭn êngiê. Hŏng dŭm bruă ngă klă mngač, Khua gĭt gai Đảng Nguyễn Phú Trọng dưi bi êdah leh kơ sa čô jing khua kiă kriê hur har, tui ksiêm jih jang bruă ngă, jhŏng mĭn jhŏng ngă, jhŏng đua klam ti anăp Đảng, ti anăp mnuih ƀuôn sang, kyuanăn yơh mâo mnuih ƀuôn sang khăp mpŭ.

          Tiê boh sa čô mnuih cộng sản klă sĭt Khua gĭt gai Đảng Nguyễn Phú Trọng mdei leh amâo lŏ êran ôh, ƀiădah kluôm Đảng, jih jang mnuih ƀuôn sang hdơr nanao kơ ñu sa klei mĭn prŏng mơ̆ng cách mạng Việt Nam, jing mnuih thâo kđi, jing pô dhar kreh prŏng, jing hla čhiăm gru ba êlan êlâo hlăm klei hlak mblang kơ Đảng, jih klei hdĭp kyua lăn čar, kyua mnuih ƀuôn sang, kyua kơ klei mĭng prŏng siam./.